Հանրապետությունում յուրաքանչյուր ամսվա 2-3-ը թոշակառուների համար ամենասպասված օրերն են։ Այդ օրը թոշակների ստացման գործընթացն է տեղի ունենում։ Թոշակի հույսով ապրող մարդիկ մեկ ամիս սպասում են այդ օրվան։ «Առաջին լրատվական»-ի խմբագրություն ահազանգած քաղաքացին հայտնեց, որ երեկ՝ ապրիլի 2-ին, Երևանի Քանաքեռ-Զեյթուն վարչական շրջանի Ազատության 24/7 հասցեում գտնվող «ՎՏԲ-Հայաստան» բանկի մասնաճյուղում արտակարգ դեպք է տեղի ունեցել։
Մեզ ահազանգած քաղաքացու տեղեկացմամբ՝ նույն վարչական շրջանի բնակիչ, 52-ամյա թոշակառու, երկրորդ կարգի հաշմանդամություն ունեցող կինը, բանկի հենց այդ մասնաճյուղի հարևանությամբ գտնվող բանկոմատից փորձել է կանխիկացնել թոշակի գումարը։
Քարտը բանկոմատի մեջ դնելուց հետո կտրոն է ստանում, որ գումարը կանխիկացվել է, բանկոմատը քարտը առգրավել է՝ չտրամադրելով գումարը։ Թոշակառու կինն իրեն օգնության հասած հարևանի հետ դիմել է «ՎՏԲ-Հայաստան» բանկի տվյալ մասնաճյուղ՝ ներկայացնելով խնդիրը։ Մեր զրուցակցի խոսքերով՝ բանկում բյուրոկրատիան ու հաճախորդների նկատմամբ անտարբեր վերաբերմունքը հասել է գագաթնակետին։
«Մեզ ասացին՝ պետք է գնաք կենտրոնական մասնաճյուղ և դիմում-բողոքների բաժնում բողոք գրեք, 10-օրյա ժամկետում հարցին գուցե լուծում կտրվի։ Առանց հաշվի առնելու, որ կինը թոշակառու է, երկրորդ կարգի հաշմանդամ, հազիվ է կարողանում քայլել, էլ չեմ ասում, որ իրենց այս օրերին պետք է հնարավորինս զերծ պահել շփումներից։ Կնոջ քարտը տեղում, մի քանի րոպեի ընթացքում տվեցին։ Բայց գումարը՝ ոչ։ Ասում եմ՝ հնարավոր չէ՞ տեսախցիկներով նայել, որ կինը գումար չի ստացել։ Տվեք կնոջն իր գումարը, թող գնա։ Մարդն ինչպե՞ս պետք է 10 օր առանց գումարի ապրի, այն էլ այս իրավիճակում։ Նրանք թքած ունեն իրենց հաճախորդների վրա։ Իրենց մոտ բյուրոկրատիան գագաթնակետին է հասել»,- վրդովված նշեց մեզ ահազանգած քաղաքացին։ Նշենք, որ, քաղաքացու խոսքերով, «ՎՏԲ-Հայաստան» բանկի այդ մասնաճյուղում այսօր քաշքշուք էր, նրա կարծիքով՝ հավանաբար, այս խնդիրը միայն իրենց հետ չի պատահել։
Նշենք, որ ՀՀ-ում հայտարարված արտակարգ դրության պայմաններում, կորոնավիրուսային համավարակի ահագնացող վտանգի պայմաններում, երբ առավել քան խոցելի են թոշակառուները, նրանց պետք է հնարավորինս զերծ պահել նման իրավիճակներից։
Թոշակառու կնոջ տվյալները չենք հրապարակում՝ հաշվի առնելով վերջինիս ցանկությունը և անձնական տվյալների գաղտնիությունը։ Սակայն բանկից մեզ հետ կապ հաստատելու և հարցին լուծում տալու դեպքում պատրաստ ենք հավելյալ տվյալներ տրամադրել։
