Կառավարությունը որոշում է ընդունել, որով հնարավորություն է տրվում Զինված ուժերի սննդի պատրաստման և մատուցման ծառայություն ապահովող կազմակերպությունների հետ գնման գործընթացն իրականացնել կանխավճար տրամադրելու միջոցով՝ այդ կազմակերպությունների կողմից բանկային երաշխիք ներկայացնելու դեպքում:
Պաշտպանության նախարար Դավիթ Տոնոյանի տեղեկացմամբ՝ կանխավճարի մարումն իրականացվելու է ծառայությունների մատուցման հանձնման-ընդունման արձանագրությունների հիման վրա կատարվելիք վճարումներից 10%-ի չափով նվազեցնելու միջոցով:
Նախագծով առաջարկվում է պայմանագրերով սահմանված սննդի պատրաստման և մատուցման ծառայության բաղադրիչի (մեկ զինծառայողի մեկ օրվա համար 3000 դրամ վճարման ենթակա) մասով կանխավճարի հատկացում: Կանխավճարը կարող է տրամադրվել՝ հաշվի առնելով կազմակերպությունների առաջարկը՝ պարտադիր պայման սահմանելով կանխավճարի ապահովման բանկային երաշխիքի ներկայացումը:
«Առաջին լրատվական»-ի հետ զրույցում այդ ընկերություններից մեկի՝ «Արտ լանչ»-ի հիմնադիր Բակուր Մելքոնյանն ասաց՝ հաշվի առնելով այն հանգամանքը, որ պարենային ապրանքները գնալով թանկանում են, Ռուսաստանից նպարեղենի ներկրումը ժամանակավորապես դադարեցված է, պետք է կարողանան պաշար հավաքել, իսկ դրա համար կանխավճար է հարկավոր։
«Մենք բնականաբար շատ դրական ենք գնահատում կառավարության որոշումը։ Այս դեպքում մենք ունենք ֆիքսված, հաստատված պատվեր։ Եթե այլ պարագայում նման իրավիճակի դեպքում ընկերությունը կարող էր կորցնել հաճախորդներ ու փակվել, ապա այս դեպքում նման բան չի կարող լինել։ Այս պարագայում միակ խնդիրը ապրանքի թանկացումն է, դոլարի արժեզրկումը և այլն։ Մենք հաստատված պատվեր ունենք, այս մասով որևէ խնդիր չկա։ Խնդիրը կլինի այն, որ ապրանքները կսկսեն թանկանալ, ու եկամուտներ չստանալ»,- մանրամասնեց ընկերության տնօրենը։
Բակուր Մելքոնյանը հաստատեց՝ բանակի ու զինվորի սնունդը որևէ կերպ չի տուժելու այս իրավիճակից։ Սա որևէ կերպ չի անդրադառնա բանակում սննդի մատակարարման բնականոն գործընթացի ու որակի վրա՝ վստահեցրեց «Արտ Լանչ»-ի տնօրենը։
Վարչապետ Նիկոլ Փաշինյանի խոսքով՝ այս ամենի նպատակը մեկն է՝ զինվորին ապահովել հնարավորինս բարձրորակ սննդով: «Ընկերություններն այս ընթացքում ներդրումներ են արել, և դրանք չեն փոխհատուցվել, ոչ մի կոպեկ փող չենք տվել, բայց կան նրբություններ, որ պետք է պարզաբանվեն. մենք քննարկումների արդյունքում որոշեցինք, որ որոշակի կանխավճար տրվի արդեն իսկ սեփական միջոցների հաշվին կատարված ներդրումների որոշակի մասի համար»,- ասել է Փաշինյանը։
