Կորոնավիրուսը նոր թափ է ստանում Գլենդելում. այս պահին կա 86 հիվանդ, և օրական ավելանում է վարակվածների թիվը. թե նրանցից ով քանի տարեկան է՝ չի հաղորդվում, քանի որ օրենքներ կան, որ պաշտպանում են հիվանդի անձնական տվյալները և տեղեկությունները։ Այս մասին «Առաջին լրատվական»-ի հետ զրույցում ասաց Գլենդելի քաղաքային խորհրդի նորընտիր նախագահ Արդի Արտաշես Քասախյանը:
«Իհարկե, մեզ մտահոգում է Գլենդելում հիվանդների թիվը, բայց մենք պետք է նայենք նաև Գլենդելին հարակից քաղաքների թվերը։ Եվ եթե նայում ենք Լոս Անջելեսի շրջանի քաղաքները, ապա մեր հարակից քաղաքներում երևի թե արդեն 200 վարակված կա։ Միայն գիտենք, որ այդ հիվանդների մեծամասնության վիճակը լուրջ չէ։ Այստեղ այդպիսի մարդկանց ասում են, որ պետք է միայն տանը մնան։ Այս պահի դրությամբ Գլենդելում ունեցել ենք երեք մահ, որից երկուսը առողջական լուրջ բարդություններ են ունեցել»,- ասաց Արդի Քասախյանը։
Թե երբ քաղաքը կվերադառնա բնականոն կյանքի՝ նա դժվարացավ նշել, բայց ասաց, որ որպես քաղաքային իշխանություն՝ կատարում են իրենց աշխատանքը, այդ թվում՝ համակարգում են ոստիկանության, հրշեջների աշխատանքը։
«Անշուշտ, նրանք հիմա զբաղված են նաև կորոնավիրուսի դեմ աշխատանքով։ Այս պահին Գլենդելի մոտ 70-80 տոկոսը դադարեցրել է իր բնականոն կյանքի ընթացքը, այսինքն՝ ոչ ոք փողոց դուրս չի գալիս։ Ասում են, թե հայերը առաջվա պես իրար տեսնում են, համբուրվում են, տարածում են վիրուսը, բայց ես անձամբ նման բան չեմ տեսել։ Գուցե հազվագյուտ դեպքեր կան։ Ես կանխատեսում եմ, որ մինչև մայիս այս վիճակը կտևի։ Իհարկե, դա երկրի տնտեսության համար վատ է, բայց եթե դա օգնի, որ նվազեցնենք հիվանդացության կորը, ուրեմն ամեն ինչ լավ կլինի»,- հավելեց նա։
Քասախյանը համաձայն չէ Թրամփի այն դիտարկմանը, որ ապրիլի 12-ին՝ արտակարգ դրության ավարտից հետո, պետք է վերադառնալ բնականոն աշխատանքի. «Ես, իհարկե, նախագահի պաշտոնը հարգում եմ, բայց կարծում եմ, որ պարոն Թրամփի ասածները մի քիչ ավելի լավատեսական են, քան իրականությունն է։ Չեմ զարմանա, որ ինքը փոխի իր կարծիքը։ Ինքը նաև ասել էր, որ Զատիկին եկեղեցիները լեցուն կլինեն։ Ես հույս ունեմ, որ Զատիկին լեցուն չեն լինի, որովհետև մասնագետները նշում են, որ մինչև ապրիլի կեսը մենք դեռ չենք հասնելու պիկին»։
Հանրությունը, Քասախյանի խոսքով, մտահոգված է, քանի որ եթե մարդը մեկ ամիս աշխատանքի չի գնում և եկամուտ չունի, դա վատ է անդրադառնում։
«Հայ համայնքը և մնացած բոլոր համայնքները ձեռք ձեռքի տված փորձում են իրար օգնել ու հաղթահարել այս բարդ ժամանակները։ Հայության մեծամասնությունը, որ դժվարություններ է տեսել, ասենք, ԽՍՀՄ-ում կամ Լիբանանի պատերազմի ժամանակ, սովոր է նման բարդություններին։ Մենք շատ ենք լսել պատմություններ, որ Արցախի պատերազմի ժամանակ մարդիկ ամիսներով մնացել են նկուղներում՝ պաշտպանվելով ադրբեջանական հրթիռներից։ Հիմա էստեղ մենք արդեն 2-3 շաբաթ տանն ենք մնացել, և չեմ կարծում, որ դա աշխարհի վերջն է։ Պարզապես մարդը պետք է զգույշ լինի, ավելորդ անգամ դուրս չգա, շփումներ չունենա մյուսների հետ։ Նաև հիշենք, որ վարակվածների մեծամասնության դեպքում շատ լուրջ հետևանքներ չեն լինելու, թոքերի օդափոխության սարքերի կարիք չի լինելու։ Ես հասկանում եմ, որ եթե ես վարակվեմ, գուցե ինձ վրա ծանր չազդի, բայց ես կդառնամ զենք, որով կարող եմ փոխանցել վարակը ուրիշներին, որոնց կարող է հիվանդությունը լուրջ վնասել։ Դրա համար նախընտրում եմ տանը մնալ և չվտանգել ուրիշներին»,- հավելեց Գլենդելի քաղաքային խորհրդի նորընտիր նախագահը։