Կորոնավիրուսի հետևանքով տնտեսական, ֆինանսական վնասներն արդեն ակնհայտ են: Ինչպիսի՞ հոգեբանական ազդեցություն կունենա ինքնամեկուսացումը: Դերասան Հայկ Պետրոսյանը, ով նույնպես ինքնամեկուսացել է, տեսակապով «Առաջին լրատվական»-ի հետ զրույցում կարծիք հայտնեց, որ մարդկանց մի մասն ավելի ագրեսիվ է դարձել, և համացանցում հնչող մարդասիրական կոչերի տակ երբեմն հենց ագրեսիան է թաքնված: «Կարծում եմ՝ հոգեբանական հետևանքներն անհատական կլինեն, մի մասը կարող է ավելի շատ գնահատել այն, ինչ ունի: Եթե այսպես ևս մի հարյուր օր ձգվի, կարող է մտածենք՝ մենք դրախտում էինք ապրում, ինչու էինք այդքան բողոքում, բորբոքվում…
Բայց մի բան արդեն ակնհայտ է՝ ոչ միայն Հայաստանում, այլև ամբողջ աշխարհում մարդկանց տոտալ կոնտրոլը գնալով մեծանում է… Քաղաքական, սոցիալական փոփոխություններն արդեն գծագրվում են…»:
Հարցին, թե ինչպես է արտակարգ դրությունը, ինքնամեկուսացումն ազդել իր ներաշխարհի, հետաքրքրությունների վրա, Հայկ Պետրոսյանը նշեց. «Ես ապրում էի մի կյանքով, և դա իմ աշխատանքն էր, որը նման էր վազքի, միշտ շտապում էի, միշտ ուշանում էի, ապրում էի վտանգավոր տեպմի մեջ և չէի հասցնում շատ բաներ տեսնել: Հիմա հանգստություն է եկել, իմ հարազատների հետ եմ շփվում, ինչը մեծ երջանկություն է: Ժամանակ կա նաև ինքդ քեզ ուսումնասիրելու, ինքդ քեզ հետ անկեղծ լինելու: Յուրաքանչյուր մարդու համար կյանքի գլխավոր հաղթանակներից մեկն ինքնահաղթանակն է, և հիմա հրաշալի ժամանակ կա դրանով լուրջ զբաղվելու, ինչը կարող է անդրադառնալ կյանքի տարբեր բնագավառների վրա՝ ինչպես ես վերաբերվում քո առողջությանը, ինչպես ես հետևում քո մտավոր զարգացվածությանը, մտավոր աճին, ում հետ ես շփվում, ինչ ես կարդում ու լսում:
Սա հետաքրքիր մի ժամանակաշրջան է կրիտիկական մտածելակերպ ձևավորելու համար, որովհետև այսօր աշխարհում մի վտանգավոր բան կա՝ ինֆորմացիան այնքան շատ է, որ բարդ է սեփական կարծիք ունենալ… Եթե յուրաքանչյուրս գոնե մի քիչ կարողանանք այս ընթացքում փոխել մեզ, դա արդեն մեծ հաղթանակ կլինի»:
«Մնացե՛ք տանը և ստեղծեք սիրո վիրուս»,- կոչ արեց դերասանը:
Մանրամասն՝ տեսանյութում:
