Արցախյան ընտրությունների նախնական տվյալներով՝ ապրիլի14-ին տեղի կունենա Արցախի նախագահի ընտրության երկրորդ փուլ. իհարկե դեռ պահպանվում է առաջին, երկրորդ տեղերն զբաղեցրած թեկնածուների քաղաքական համաձայնության տարբերակը: Իսկ խորհրդարան անցել են հինգ քաղաքական ուժեր: Տարօրինակն այն է, որ նորընտիր խորհրդարան չի անցել նախագահական մրցավազքում երկրորդ տեղը զբաղեցրած թեկնածուին ներկայացնող դաշինքը:
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության գործադիր մարմնի անդամ Հայկ Սահակյանը և ԱԺ «Իմ քայլը» խմբակցության պատգամավոր Սոս Ավետիսյանը:
Հայկ Սահակյանի կարծիքով՝ Արցախյան ընտրություններին ակնկալվում էր մասնակցության ավելի փոքր տոկոս, սակայն զարմանալիորեն մեծ թվով քաղաքացիներ են գնացել իրենց քաղաքական քայլը կատարելու. «Հաշվի առնելով թեկնածուների թիվը, կանխատեսվում էր, որ կլինի ընտրությունների երկրորդ փուլ»:
Սոս Ավետիսյանի խոսքով՝ երկրորդ փուլում շատ զգույշ պետք է վարվեն թեկնածուները. «Պետք է դիտարկեն բոլոր տարբերակները, որովհետև անվտանգության հարցը մնում է առաջնային:
Դիտորդները ընտրությունները կասկածի տակ դնելու վերաբերյալ հայտարարություն չեն արել: Սոս Ավետիսյանի խոսքով՝ դիտորդների կողմից արձանագրվել են որոշակի խախտումներ. «Երկրորդ փուլում հնարավորինս պետք է բացառել դրանք»:
Անդրադառնալով դիտարկմանը, որ այդ խախտումները հիմնականում կապված են քվեաթերթիկը լուսանկարելու հետ, Հայկ Սահակյանը նշեց, որ Արցախում մարդիկ խոսում էին նաև ընտրություններից առաջ հեռախոսային «տեռորի» մասին, պարբերաբար զանգահարել են, իհարկե չեն սպառնացել, բայց հարցադրումներ են արել, որոնք բավարար էին, որ մարդու քաղաքական վարքի վրա ազդեցություն թողնեին: Սա կարևոր հանգամանք է, որը չպետք է աչքաթող անել:
Մանրամասն՝ տեսանյութում:
