«Մոսկվայի վերաբերմունքն Արցախում տեղի ունեցած ընտրությունների վերաբերյալ դժվար է այժմ ներկայացնել. ինչպես գիտեք, Մոսկվան հիմա այլ հարցերով է զբաղված։ Բայց որքանով ես եմ հասկացել՝ շփվելով պաշտոնական շրջանակների հետ, տեսակետը հետևյալն է. Մոսկվան երբեք չի աջակցի Ղարաբաղի ուղիղ միացմանը Հայաստանին ու Լեռնային Ղարաբաղի՝ Հայաստանի մարզ դառնալուն. դա 200 տոկոսով»,- «Առաջին լրատվական»-ի հետ զրույցում նման տեսակետ հայտնեց ռուսաստանցի քաղաքագետ, «Ռեգնում» գործակալության հիմնադիր Մոդեստ Կոլերովը։
Մեր զրուցակիցն ընդգծեց. «Մենք այստեղ հրաշալի տեսնում ենք, որ Արայիկ Հարությունյանի թեկնածությունը երևի թե միակ օրինակն է Հայաստանի ներքաղաքական կյանքում, երբ Նիկոլ Փաշինյանի, որն աջակցում է Արայիկին, ու Սերժ Սարգսյանի, որին Արայիկն անձնապես մոտ է, դիրքորոշումները համընկնում են։ Նաև հայտնի է, որ Արայիկ Հարությունյանն ունի Բակո Սահակյանի աջակցությունը, ու դա խոսում է այն մասին, որ Արայիկը կոնսենսուսային ֆիգուր է՝ չնայած նա չկարողացավ հաղթել առաջին փուլում։ Ինչ վերաբերում է Մասիս Մայիլյանին, ապա նա շատ հաջողակ, փայլուն ԱԳ նախարար է՝ չնայած չստացավ բավարար աջակցություն։ Պատճառների մասին կարող ենք մտածել, բայց դա փաստ է»։
Մոդեստ Կոլերովի դիտարկմամբ՝ նրանք, ովքեր Ռուսաստանում մասնագիտորեն հետևում են Լեռնային Ղարաբաղի իրավիճակին, հստակ հարցադրում ունեն. «Հասկանալի է, որ ձեր իշխանությունների դիրքորոշումը՝ Ղարաբաղի ուղիղ միացումը Հայաստանին, անընդունելի է, դա կիսում են փորձագետների մեծամասնությունը, անկախ նրանից՝ Հայաստանից ով ինչ կասի։ Մենք պետք է շնորհավորենք և ՛ Արայիկ Հարությունյանին, և՛ Մասիս Մայիլյանին այն բարձր գնահատականի համար, որ իրենք ստացել են։ Հենց այնպես դա չէր լինի, նրանք արժանացել են այդ գնահատականին։ Երկրորդ՝ եթե երկրորդ փուլում հաղթի Մասիս Մայիլյանը, ապա որքան ես գիտեմ՝ նա նույնպես գոնե մինչև վերջերս ուներ Նիկոլ Փաշինյանի աջակցությունը, և նա խնդիր չի ունենա Երևանի հետ կապ հաստատելու համար։ Բայց նա պետք է շատ բան անի, որպեսզի կապ հաստատի այն մարդկանց ու գործիչների հետ, ովքեր հօգուտ իրեն չեն քվեարկել։ Արայիկ Հարությունյանին, ի տարբերություն Մասիս Մայիլյանի, որին վաղուցվանից գիտեմ, շատ մոտիկից չեմ ճանաչում, շատ մակերեսային գիտեմ, բայց ունեմ իր մասին պատկերացումներ։ Նա ամուր, զուսպ գործիչ է, լավ տնտեսվար, պատերազմի մասնակից, իսկ դա շատ բան է նշանակում։ Նույն ձևով եթե հաղթում է Արայիկ Հարությունյանը, նա պետք է ևս երկխոսություն հաստատի այն ընտրողների ու գործիչների հետ, ովքեր իրեն չեն աջակցել։ Երբ դու դառնում ես նախագահ՝ դու դառնում ես ամբողջ ժողովրդի նախագահը, ոչ թե մեկ կուսակցության»։
Մոդեստ Կոլերովն ասաց՝ Արայիկ Հարությունյանը որպես տնտեսության ղեկավարի բազմամյա փորձ ունեցող գործիչ չպետք է մսխի Լեռնային Ղարաբաղի քաղաքական կարևորությունը. «Այսինքն՝ չմսխի Լեռնային Ղարաբաղի սուբյեկտայնությունը։ Ռազմական հարցերով Հայաստանից կօգնեն, իսկ ահա Լեռնային Ղարաբաղի միջազգային սուբյեկտայնությունը՝ որպես հակամարտության կարգավորող կողմ, պետք է ընտրվելու դեպքում Արայիկ Հարությունյանի թիվ մեկ խնդիրը լինի։ Ես չգիտեմ, թե ով կլինի ԱԳ նախարար Արայիկ Հարությունյանի ղեկավարման օրոք, բայց կհամաձայնեք, որ Լեռնային Ղարաբաղի արտաքին քաղաքականությամբ զբաղվող թիվ մեկ գործիչը մշտապես երկրի ղեկավարն է»։
Վերջում մեր զրուցակիցն ավելացրեց. «Ով էլ հաղթի երկրորդ փուլում, իմ խորին համոզմամբ՝ պարտավոր է ամբողջությամբ օգտագործել Բակո Սահակյանի արտաքին քաղաքականության ոլորտի հսկայական փորձը։ Դա շատ կարևոր է, Բակո Սահակյանը ունի հսկայական փորձ, այդ թվում՝ Մոսկվայի հետ հարաբերությունների իմաստով։ Եվ այն կորցնել չի կարելի»։
