Ես արդարացված չեմ համարում պնդումները, թե այլ միջոցներ կարելի է կիրառել հեռախոսազանգերը ֆիքսելու միջոցով կորոնավիրուսի տարածումը կանխելու փոխարեն: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Սուրեն Գրիգորյանը:
«Սրա արդյունավետությունը ես ակնկալում եմ, որ լինելու է շատ բարձր: Պարոն Ավինյանի ելույթն ու բացատրությունները պետք է էլ ավելի պարզ դարձնի, որ դա այդպես է լինելու: Ես նաև չեմ հասկանում, թե ով է ասել և ոնց է որոշվել, որ օրինակ, ինձ համար ավելի զգայուն է, որ իմանան իմ գտնվելու վայրը կամ այն, թե ում եմ զանգել, քան այն, որ ասում են՝ առանց անձը հաստատող փաստաթղթի դուրս չգաք, կամ առհասարակ դուրս կգաք միայն ծայրահեղ անհրաժեշտության դեպքում՝: Դա՞ է ավելի մեծ միջամտություն անձի կյանքին, թե՞ սա: Ինձ թվում է, որ տնից դուրս չգալու պահանջն ավելի մեծ միջամտություն է, սակայն չգիտես ինչու դրա մասին ոչ ոք քննարկում չի ծավալում»,-ասաց նա: