Առաջիկա երկու շաբաթը ԱՄՆ-ի համար կլինի բավականին ծանր, չափազանց ծանր՝ հայտարարել է ԱՄՆ նախագահ Դոնալդ Թրամփը՝ խոսելով համաճարակի մասին: Կորոնավիրուսի համաճարակը ԱՄՆ-ում շարունակում է ծավալվել թափով, և մահերի թվով ԱՄՆ-ը գերազանցել է Չինաստանի ցուցանիշը: Դոնալդ Թրամփը հայտարարել է, որ երկու շաբաթը կլինի շատ ծանր, որից հետո կերևա թունելի լույսը, և նշել, թե այդ մասին հավաստիացնում են մասնագետները: Թե ինչ մասնագետների մասին է խոսքը՝ նա չի ասել, թեև հավանական է, որ խոսքն ըստ երևույթին կորոնավիրուսի դեմ պայքարի միջոցների հարցում առողջապահական ճեղքման մասն է:
Ինչպես հայտնի է, ԱՄՆ-ը մարտի 16-ից սկսել է պատվաստանյութի փորձարկումները կամավորների վրա: Պատվաստանյութը ստեղծել է հայազգի բարերար Նուբար Աֆեյանի կազմակերպությունը՝ ԱՄՆ առողջապահության ինստիտուտի հետ գործակցությամբ: Նուբար Աֆեյանը օրերս մի շարք անվանի հայերի և Հայաստանի առողջապահության նախարարի հետ համատեղ վեբիմարի ընթացքում ասել էր, որ ակնկալում են գարնանը ստանալ կամավորների վրա պատվաստանյութի փորձարկման արդյունքը:
Առաջիկա երկու շաբաթները վճռորոշ շրջան է հայտարարել նաև Հայաստանի կառավարությունը: Համենայնդեպս, ապրիլի 1-ից կառավարությունը հայտարարել է կարանտինի, քաղաքացիների ինքնամեկուսացման պայմանների խստացման մասին: Պարետ Տիգրան Ավինյանը հայտնել է, որ հույս ունեն ապրիլի կեսից կամ մայիսի սկզբին երկիրը վերադարձնել կյանքի բնականոն ռեժիմի:
Նախօրեին Հայաստանի արտգործնախարարին է զանգահարել ԱՄՆ պետքարտուղարի Եվրոպայի ու Եվրասիայի հարցերի տեղակալ Ֆիլիպ Ռիքերը: Զոհրաբ Մնացականյանի հետ նա խոսել է համաճարակի դեմ պայքարի մասին, այդ պայքարում գործակցության մասին: Եղե՞լ է խոսք թունելի վերջի այն լույսի մասին, որի վերաբերյալ ակնարկել է ԱՄՆ նախագահ Թրամփը: Հայաստանը պետք է «սպասի» այդ լույսին և դրա, այսպես ասած, միջազգային արձագանքին ու ազդեցությանը նաև հայաստանյան իրավիճակի՞ վրա, թե՞ կարող է նաև ներգրավվել այդ լույսի մոտեցմանը: Այդ իմաստով հետաքրքիր է, որ օրեր առաջ Հայաստանի նախագահ Արմեն Սարգսյանը ևս հեռախոսազրույց էր ունեցել պատվաստանյութի ստեղծման վրա աշխատած ընկերության հիմնադիր և տնօրեն, մեր հայրենակից Նուբար Աֆեյանի հետ:
Կորոնավիրուսը չնայած երկրներին պարտադրած, այսպես ասած, փակվելու, ինքնաբավության մղվելու ռեժիմի, այդուհանդերձ «կառավարում» է համաշխարհային իրավիճակ՝ փոխազդեցության մի շարք պահպանվող և անխուսափելի շղթաներով: Այդ շղթայում ԱՄՆ-ը ակնհայտորեն ստանձնում է առանցքային դեր, ինչն էական է դարձնում շղթայի առանցքային օղակին առավելագույնս մոտ և հաղորդակից լինելու անհրաժեշտությունը Հայաստանի համար: