Այս նախագիծը որևէ բովանդակային միջամտություն անձանց հեռախոսազանգերին և հաղորդագրություններին չի նախատեսում և չի կարող նախատեսել. Այն ուղղված է բացառապես կորոնավիրուսի դեմ պայքարի հրամայականով պայմանավորված անձանց շփման շրջանակը որոշելուն: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արուսյան Ջուլհակյանը՝ անդրադառնալով նախօրեին ԱԺ արտահերթ նիստում ընդունված օրենսդրական փաթեթին, որը վերաբերում է բջջային օպերատորների միջոցով քաղաքացիների գտնվելու վայրը և շփման շրջանակը ֆիքսելուն:
«Այս նախագիծը կյանքեր փրկելու մասին է, այլ ոչ թե այն,ինչ ներկայացնում են որոշ գործիչներ, այդ թվում խորհրդարանական ընդդիմությունից: Նրանք փորձում են ներկայացնել, թե իբր կառավարությունն ու իշխանությունները պատրաստվում են գաղտնալսել քաղաքացիներին: Դա կատարյալ սուտ է և մանիպուլյացիա: Կարծում եմ՝ քաղաքացիները պետք է գնահատական տան, թե ինչու են որոշ գործիչներ ստում քաղաքական աչոկներ հավաքելու նպատակով»,-ասաց նա:
Դիտարկմանը, որ «Իմ քայլի» պատգամավորների շրջանում էլ կային վերապահումներ նախագծի վերաբերյալ, Ջուլհակյանն արձագանքեց, որ այդ վերապահումները վերաբերում էին որոշ ձևակերպումների. «Համենայնդեպս մեր թիմից որևէ մեկը սուտ տեղեկություններ չի հայտնում հանրությանը, թե իշխանությունները պատրաստվում են գաղտնալսել քաղաքացիներին»: