Ես դրական եմ տրամադրված այդ թեկնածուի մասով, որովհետև հետևելով նրան մասնագիտական տարբեր կոնֆերանսներում, թե շփվելով նրա հետ, կարող եմ վստահ ասել, որ նա օժտված է բավականաչափ բարձր պրոֆեսիոնալիզմով: Այս մասին «Առաջին լրատվական.-ի հետ զրույցում նշեց ԱԺ «Իմ քայլը» խմբակցության պատգամավոր Արտակ Մանուկյանը՝ անդրադառնալով ԿԲ նախագահի թեկնածու Մարտին Գալստյանին, ով այս պահին ԿԲ խորհրդի անդամ է:
«Այսօր մենք հանձնաժողովում առիթ կունենանք լսելու նաև Կենտրոնական բանկի տեսլականը: Հատկապես սա կարևոր է ներկա ժամանակաշրջանում, որովհետև աշխարհի բոլոր երկրները երկու գործիքակազմով են փորձում տնտեսական հետևանքները մեղմել: Մեկը դրամավարկային կամ մոնետար քաղաքականությամբ, մյուսը՝ հարկաբյուջետային կամ ֆիսկալ քաղաքականությամբ:
Չնայած տարատեսակ կարծիքներին, ես կարծում եմ, որ ՀՀ կենտրոնական բանկն իր չափավոր զուսպ մոտեցումներով, ըստ էության, բավականաչափ մեծ ֆինանսական կայունության պաշար ունի»,-ասաց Արտակ Մանուկյանը:
