Բելառուսում հիմնական ոչ պետական ԶԼՄ-ները և Լրագրողների բելառուսական միությունը պահանջով դիմել են իշխանություններին՝ հանրությանը ժամանակին և ճշգրիտ տեղեկատվություն տրամադրել կորոնավիրուսի համավարակի հետ կապված իրավիճակի վերաբերյալ։ Ինչպես Մինսկից հաղորդել է Ֆրանսիական միջազգային ռադիոյի (RFI) թղթակիցը՝ «Վյասնա» իրավապաշտպան կենտրոնը նույնպես միացել է Լրագրողների միության հայտարարությանը։
«Մենք իրավունք ունենք իմանալու, թե ինչ է կատարվում երկրում և ինչ է անում այդ իրավիճակում պետությունը»։ «Մեր ժողովուրդը իրավունք ունի իմանալու ճշմարտությունը»,- ասված է «Վյասնայի» ղեկավար, իրավապաշտպան՝ Ալեսի Բելյացկիի ուղերձում։
Բրիտանական հայտնի դերասան և գրող Սթիվեն Ֆրայն իր թվիթերում գրել է, որ Լուկաշենկոյի վերաբերմունքը կորոնավիրուսի համավարակի և իր երկրում իրավիճակի նկատմամբ «ստի, ահաբեկչության և անմարդկայնության նոր կարգ է, Բելառուսն իրոք տառապում է»։
Հիշեցնենք, որ մարտի 30-ի տվյալներով, Բելառուսում նոր տիպի կորոնավիրուսով վարակվածության 152 դեպք է արձանագրվել։