Լուրեր
Ադրբեջանում սոցիալ-տնտեսական վիճակի և սահմանային լարվածության միջև կա ուղիղ կապ. չպետք է մոռանանք ապրիլյանի դասերը

Սահմանագոտում իրավիճակը կայունացնելու և պանդեմիայի պայմաններում ադրբեջանական Զինված ուժերի՝ այս դեպքում սահմանապահ ուժերի ձեռնարկած անպատկառ գործողությունները սաստելու նպատակով Հայաստանի Զինված ուժերը դիմելու են իրավիճակին համարժեք գործողությունների, ինչի հետևանքների ամբողջ պատասխանատվությունը կրելու է Ադրբեջանի ռազմաքաղաքական ղեկավարությունը:  Այս մասին հայտարարություն է տարածել ՀՀ Պն մամուլի խոսնակը: Հայտարարությունը պայմանավորված էր նրանով, որ ադրբեջանական կողմը օրերս դիմել էր դիվերսիոն գործողությունների, Տավուշի մարզի Նոյեմբերյանի շրջանի հայկական դիքերի ուղղությամբ կրակ էր բացել, որի հետևանքով վիրավորվել է 14-ամյա երեխա:

Թեմայի շուրջ «Առաջին լրատվական»-ի հետ քննարկմանը մասնակցեցին «Օրբելի» կենտրոնի փորձագետներ Տարոն Հովհաննիսյանը և Նարեկ Մինասյանը:

«Ադրբեջանի 2020թ. բյուջեի 56 տոկոսը ապահովելու էր նավթային ոլորտը, ինչը չի լինելու… Նախնական գնահատականներով՝ Ադրբեջանը շուրջ 5 միլիարդ դոլարի կորուստ է կրելու»,- նշեց Տարոն Հովհաննիսյանը:

Նարեկ Մինասյանը հավելեց, որ Ադրբեջանի տնտեսությունը, կորոնավիրոսով պայմանավորված, բացասական հետևանքներ է կրում, և սկսել է ծախսել իր ռեզերվները: «Համաճարակային իրավիճակից օգտվելով՝ Ադրբեջանը պայքար է տանում ընդդիմության դեմ, ինչը ԵԱՀԿ-ի գնահատմամբ, անթույատրելի է: Ադրբեջանական կողմը փորձում է «ստրախովկաներ» տեսնել, քայլեր է ձեռնարկում հանրային դժգոհությունն առաջնորդողներին չեզոքացնելու ուղղությամբ»,- նշեց Ն. Մինասյանը:

Քննարկման մասնակիցներն ընդգծեցին, որ Ադրբեջանում սոցիալ-տնտեսական վիճակի և սահմանային լարվածության միջև կա ուղիղ կապ. Ադրբեջանը հանրային ուշադրությունը շեղելու համար փորձում է սահմանային լարվածությունների գնալ:

Մանրամասն՝ տեսանյութում:

  • Դիտումներ՝ *