Երեկ կրթության, գիտության, մշակույթի և սպորտի նախարար Արայիկ Հարությունյանը գրություն է ուղարկել բուհերի ռեկտորներին՝ առաջարկելով մինչև ապրիլի 14-ը ուսման վարձերը չվճարող ուսանողներին դուրս չթողնել բուհերից։
«Ռեկտորներին ուղարկված գրության մեջ ասվում է, որ հիմք ընդունելով ՀՀ-ում նոր կորոնավիրուսի կանխարգելման համար հայտարարված արտակարգ դրությունը, առաջարկում եմ արտակարգ դրության ժամանակահատվածում զերծ մնալ ուսման վարձավճարների չվճարման հետ կապված ուսանողներին ուսումնական գործընթացում չընդգրկելուց:
Արտակարգ դրության ավարտից հետո պետք է սահմանել ուսման վարձավճարների վճարման ժամանակացույց: Միաժամանակ այն ուսանողները, որոնք նշված ժամանակահատվածում պատրաստակամություն կհայտնեն առցանց վճարելու ուսման վարձը, ապա նրանց պետք է տրամադրել վճարման պայմանների մասին անհրաժեշտ տեղեկատվությունը: Ուզում եմ նաև խնդրել, հորդորել ուսանողներին, ովքեր ունեն հնարավորություն այս պահին, ապա կատարեն այդ վճարումները: Դրանք բուհերի համար շատ լուրջ ֆինանսական ներհոսք են, աշխատավարձերը դրանցից են վճարվում»,- ի մասնավորի նշել է Արայիկ Հարությունյանը։
«Առաջին լրատվական»-ը մի քանի բուհերից հետաքրքրվեց՝ ստացե՞լ են արդյոք նախարարի գրությունը և ինչպե՞ս են պատրաստվում արձագանքել։
Երևանի պետական համալսարանի ռեկտորի ժամանակավոր պաշտոնակատար Գեղամ Գևորգյանն արձագանքեց, որ ստացել են նախարարի գրությունը։
«Ընդունել ենք՝ ի կատարումն»,- ասաց Գեղամ Գևորգյանը։ Նա չգիտեր, թե ստույգ քանի անվճարունակ ուսանող ունի ԵՊՀ-ն։ Ռեկտորի ժ/պ-ն նշեց նաև, որ ուսման վճարը մուծել չկարողանալու պատճառով ինքը բողոքներ չի ստացել ուսանողներից։
Հայաստանի պետական տնտեսագիտական համալսարանի լրատվության և հանրային կապերի վարչության պետ Գոհար Գևորգյանը ևս տեղեկացրեց, որ իրենց բուհը ստացել է նախարարի գրությունը։
«Մեր բուհը չէր էլ պահանջել վճարել վարձերը։ Բնական է, որ արտակարգ դրության պայմաններում ուսման վարձի վճարումը կհետաձգվի։ Մենք որևէ բողոք չենք ստացել»,- ասաց Գոհար Գևորգյանը։
Հայկական պետական մանկավարժական համալսարանի լրատվության և հանրության հետ կապերի վարչության պետ Դիանա Մարկոսյանն էլ մեր հարցմանն արձագանքեց․ «Նախարարի հորդոր-առաջարկին, անշուշտ, ծանոթ ենք։
Ստեղծված իրավիճակում ոչ մի ուսանող ոչ միայն չի հեռացվել և չի հեռացվի ուսման վարձը չվճարելու պատճառով, այլև նրանց թույլատրված է մասնակցել օնլայն դասապրոցեսին՝ անկախ ուսման վարձի վճարման հանգամանքից։
Ռեկտորատը, դասախոսները և ուսանողները համատեղ կմշակեն իրական գրաֆիկ՝ ֆինանսատնտեսական վիճակն այնպիսի պայմաններում պահպանելու, որպեսզի համալսարանը կարողանա տարրական խնդիրները լուծել՝ աշխատավարձ վճարել և ուսումնական գործընթացի կազմակերպման համար տեխնիկական պայմաններ ապահովել»։