Վարակվածների թիվն ավելացել է միանգամից 5-ով, բայց կա նաեւ 1 առողջացող: Վրաստանին դեռ հաջողվում է խուսափել մահացու դեպքերը՝ կորոնավիրուսից ոչ մի մահացած չկա:
Վրաստանում կորոնավիրուսային վարակով հիվանդների թիվը հասել է 108-ի, հաղորդվում է կառավարության stopcov.ge կայքում:
Դեռեւս մարտի 30-ին հաղորդվում էր 91 վարակվածի մասին: Վրաստանում կորոնավիրուսային վարակից առողջացել է եւս մեկ մարդ՝ առողջացածների ընդհանուր թիվը հասցնելով 21-ի:
Կարանտինում շարունակում են մնալ 4 995 մարդ, հիվանդանոցային պայմաններում բուժվում են՝ 278-ը:
Ըստ վարակաբանների կանխատեսումների, երկրում վարակվածների թիվը շարունակելու է աճել:
Կորոնավիրուսային համավարակի հետ կապված՝ Վրաստանը երկրի տարածքում կարանտինային ռեժիմ է ներդրել: Որոշումն ուժի մեջ է մտել մարտի 31-ից առավոտյան 8-ից: Հաստատվել է նաև պարետային ժամ ՝ 21: 00-ից մինչև 06: 00-ն:
Հասարակական տրանսպորտը ամբողջովին դադարեցված է, տաքսիների շահագործման խիստ կանոնակարգ է սահմանվել՝ հետևի նստատեղում ոչ ավելի, քան երկու ուղևոր: Փակվել են Թբիլիսի, Քութաիսի, Բաթումի, Փոթի, Զուգդիդի և Ռուսթավի քաղաքները:
Բոլոր քաղաքացիները, դուրս գալով փողոց, իրենց հետ պետք է ունենան նույնականացման քարտ: Բոլորը, հատկապես տարեցները, տնից կարող են դուրս գալ միայն արտակարգ իրավիճակների դեպքում:
