Լուրեր
Սովորական պայմաններում ոչ ոք չի պատրաստվում նայել ով ում զանգեց կամ որտեղ է գտնվում․ Սուրեն Գրիգորյան
  • 13:27
  • 2020-03-31
  • Դիտումներ՝ *

Թե ում մոտ են կենտրոնանալու այդ տվյալները և ով է այդ ամենն անալիզ անելու, կառավարության որոշմամբ է ֆիքսվելու: Այս մասին այսօր ճեպազրույցի ժամանակ ասաց ԱԺ պետաիրավական հանձնաժողովի անդամ Սուրեն Գրիգորյանը անդրադառնալով «Արտակարգ դրության իրավական ռեժիմի մասին» օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթին:

«Դա ըստ օրենքի թողնված է կառավարության որոշման տիրույթում: Երբ որոշումը կկայացվի, հնարավորություն կունենաք գնահատել ճիշտ գերատեսչության է դա վստահվել, թե ոչ: Բայց երեք բան է պետք ֆիքսել. Առաջինը, որ այս բոլոր տվյալները ոչնչացվելու են արտակարգ դրության ավարտից հետո առավելագույնը մեկ ամսվա ժամկետում: Այդ բոլոր տվյալները ոչնչացվելու են: Երկրորդը, երբ խոսում ենք այդ տվյալներից, պետք է հասկանանք, թե դրանք ի չարիք օգտագործելու ինչ հնարավորություններ կան: Խոսում ենք երկու տվյալի մասին անձն անձին է զանգահարել և անձը որոշակի ժամանակահատվածում գտնվել է այսինչ վայրում: 6 ամիս կամ 1 տարի հետո այն ինֆորմացիան, որ այսօր այստեղ եմ գտնվել, դժվար եմ պատկերացնում, թե այդ տվյալներն ինչպես կարող են վատ նպատակներով օգտագործվել: Եվ երրորդը այս բոլոր միջոցառումները կիրառելի են բացառապես համաճարակով պայմանավորված արտակարգ դրության շրջանակներում»,-ընդգծեց Սուրեն Գրիգորյանը` հավելելով, որ սովորական պայմաններում ոչ ոք չի պատրաստվում նայել, թե ով ում զանգեց և ով որտեղ է գտնվում:

  • Դիտումներ՝ *