«Ցավոք սրտի դա սովորական պատմություն է։ Կարդալով հայկական ու ադրբեջանական ԶԼՄ-ները, հասկանում ենք, որ շփման գծում անընդհատ ինչ-որ բան կատարվում է», -«Առաջին լրատվական»-ի հետ զրույցում ասաց ռուսաստանցի քաղաքագետ Ստանիսլավ Տարասովը՝ անդրադառնալով նախօրերին Տավուշի մարզում հակառակորդի դիվերսիոն գործողություններին, որի հետևանքով վիրավորվել է 14 տարեկան երեխա։
Տարասովը Ադրբեջանի գործողությունները չի կապում Արցախում այսօր կայանալիք խորհրդարանական և նախագահական ընտրությունների հետ. «Վիեննայի ու Սանկտ-Պետերբուրգի պայմանավորվածությունները չիրականացան։ Ու եթե օբյեկտիվ խոսենք՝ դժվար է ասել, թե որ կողմն է մեղավոր լինում, որ կողմն է նախաձեռնում։ Իհարկե կան որոշ ուժեր, որոնք հետաքրքրված են իրավիճակի բարդացմամբ։ Դա համընկավ Արցախի ընտրությունների հետ, բայց եթե Բաքուն նպատակ ունենար չեղարկել Արցախի ընտրությունները, շատ ավելի դրամատիկ գործողություններ կլինեին։ Ցավոք սրտի սա սովորական միջադեպ է, ես այդպես եմ գնահատում»։
Ինչ վերաբերում է Արցախում անցկացվող ընտրություններին, մեր զրուցակիցն ասաց՝ իրենք ուշադրությամբ հետևում են.«Արցախի հայերը խելացի ժողովուրդ են, իրենք կորոշեն ապագան, իսկ մենք կընդունենք ցանկացած արդյունք»։
Հիմա, երբ ամբողջ աշխարհը պայքարում է կորոնավիրուսային պանդեմիայի դեմ, ինչպե՞ս է հնարավոր բնորոշել Ադրբեջանի նմանատիպ գործողությունները հարցին ի պատասխան, Տարասովն ասաց. «Գիտեք՝ մենք կարծում ենք, որ երբ հիմա ամբողջ աշխարհը պայքարում է պանդեմիայի դեմ, կողմերից մեկը կարող էր առաջարկել խաղաղության համաձայնագիր կնքել, գոնե այս պայքարի ընթացքում։ Լավ, թող Ադրբեջանը այդ մասին չխոսեր, թող Փաշինյանն ասեր։ Իսկ իրենք առճակատման տրամաբանության մեջ են։ Ցավոք սրտի ապրում են նախապանդեմիայի շրջանում, բայց կարծում եմ շուտով ստիպված կլինեն փոխել իրենց քաղաքականությունը»։
Քաղաքագետը հռետորական հարցադրում է անում՝ ո՞վ է խանգարում կողմերին նման համաձայնության գալ.«Այնքան է այդ մասին խոսվում, ի՞նչն է խանգարում։ Իրենք իրավիճակը թերագնահատում են։ Տեսեք՝ Թրամփը զանգահարեց Պուտինին, Պուտինը ինքնաթիռով բժշկական օգնություն ուղարկեց Միացյալ Նահանգներին։ Իրենք կարծում են, որ պանդեմիան առաջնային է։ Ցավոք սրտի Հարավային Կովկասում այդ գիտակցությունը չկա։ Երբ հասունանա Հայաստանն ու Ադրբեջանն էլ դա կանեն, իսկ պանդեմիայի ավարտից հետո կանցնեն ղարաբաղյան հակամարտության լուծմանը»։
