Այսօր՝ մարտի 31-ին, Ազգային ժողովում շարունակվում է արտահերթ նիստի աշխատանքը: Այժմ քննարկվում է Արտակարգ դրության իրավական ռեժիմի մասին օրենքում լրացումներ կատարելու մասին օրենքի նախագիծը 2-րդ ընթերցմամբ ընդունելու հարցը:
Արդարադատության նախարար Ռուստամ Բադասյանը նշեց, որ հետևելով սոցցանցերի քննադատություններին` կարելի է արձանագրել, որ ՀՀ քաղաքացիները ամենայն լրջությամբ են վերաբերվում իրենց իրավունքներին և ազատություններին, ինչը ուրախալի է: Նա կրկնեց, որ այս սահմանափակումները վերաբերում են համաճարակի հիմքով պայմանավորված արտակարգ դրությանը. «Քաղաքացիների մասին որևէ նոր տվյալ չի հավաքվում, այլ օպերատորների մոտ արդեն առկա տվյալները համատեղվում են մեկ միասնական բազայում, և այդ տվյալները արտակարգ դրության ավարտից հետո ոչնչացվում են»:
Նախարարը բացատրեց նաև, թե ինչու է անհրաժեշտ հեռախոսազանգերին հետևել:
Նրա խոսքով` այս համակարգը արդյունավետորեն կիրառվել է Հարավային Կորեայում. «Մենք ապավինում ենք գիտությանը և մասնագետների կարծիքին, որոնք մանրամասն ուսումնասիրել են Իսրայելի, Հարավային Կորեայի, Չինաստանի փորձը համաճարակի դեմ պայքարում և հանգել են այն եզրակացության, որ այս համակարգն է ամենաարդյունավետը»:
Նախարարն ընդգծեց` նժարի վրա դրված են կյանքն ու առողջությունը և անձանց իրավունքների ու ազատությունների համաչափ սահմանափակումը. «Եթե կասկածեինք, որ այս միջոցով հնարավոր չի լինելու փրկել մարդկանց կյանքեր, ապա կառավարությունը նախագիծը հետ կկանչեր»:
Բադասյանը նաև նշեց, որ նախագծում կատարվել են որոշ փոփոխություններ:
Մանրամասները՝ տեսանյութում:
