ԱՄՆ-ը պատրաստվում է վերականգնել ոչ ամերիկյան կազմակերպություններին Իրանի ատոմային էներգիայի կազմակերպության հետ համագործակցությունն արգելող պատժամիջոցների բացառությունները։ Այս մասին հաղորդում է Reuters գործակալությունը՝ հղում անելով տեղեկացված աղբյուրներին։
Բացառությունների երկարաձգումը թույլ կտա ռուսական, չինական և եվրոպական ընկերություններին գործունեություն ծավալել Իրանի միջուկային օբյեկտներում՝ ատոմային էներգիայի խաղաղ նպատակներով օգտագործման ուղղությամբ, հայտարարել են աղբյուրները։
Միացյալ Նահանգները հնարավոր է բացառությունների վերականգնման մասին որոշում կայացնեն արդեն մարտի 30-ին, նշում են աղբյուրները։ Նրանց տվյալներով, ամերիկյան իշխանությունները գտնում են, որ այս քայլով կխոչընդոտեն Իրանում միջուկային զենքի մշակմանը։