ԱԺ անկախ պատգամավոր Արման Բաբաջանյանը ֆեյսբուքյան իր էջում գրել է.
Այսօր ժամը 19:00-19:30-ի սահմաններում ադրբեջանական զինուժը տարբեր տրամաչափի զինատեսակներից կրակել է Տավուշի մարզի Նոյեմբերյանի տարածաշրջանի մարտական հենակետերի և Բաղանիս ու Ոսկևան գյուղերի ուղղությամբ: Հակառակորդի գնդակից վիրավորվել է 2 պայմանագրային զինծառայող, ինչպես նաև Ոսկևան գյուղի բնակիչ 14-ամյա երեխա:
Երեխային վիրահատության նպատակով սկզբում տեղափոխել են Նոյեմբերյանի բուժկենտրոն, իսկ այս պահին տեղափոխում են Երևան: Շուտափույթ ապաքինում մաղթելով վիրավորված երեխային ու զինծառայողներին, ստիպված ենք արձանագրել, որ տեղի ունեցավ այն, ինչի մասին զգուշացնում էին շատերը: Ադրբեջանն օգտվում է կորոնավիրուսի համավարակի պատճառով աշխարհում ստեղծված բարդ, խառը իրավիճակից և ռազմական սադրանքների է դիմում Հայաստանի տարածքի ուղղությամբ:
Այսօր արձանագրված կրակոցները մեզ համար սովորականից ավելի զգոն ու զգույշ լինելու առիթ պետք է դառնան, քանի որ ոչ մի երաշխիք չկա, որ Ադրբեջանը նույն գործելաոճը չի շարունակի առաջիկայում: Ճիշտ հակառակը՝ հիմքեր կան պնդելու, որ մի շարք գործոններով պայմանավորված Ադրբեջանը կարող է դիմել ռազմական սադրանքների՝ սեփական հանրության ուշադրությունը շեղելու նպատակով:
Խնդիր այն է, որ որևէ մեկը չգիտի՝ Ադրբեջանում կորոնավիրուսով վարակվածների իրական թիվն ու պատկերը, մեծ է հավանականությունը, որը ինչպես շատ ավտորիտար երկներ, Ադրբեջանը ևս թաքցնում է վարակվածների և մահացության իրական ցուցանիշները, ինչը սակայն չի կարող երկար ժամանակ թաքցնել սեփական հանրությունից:
Դրան զուգահեռ միջազգային շուկայում շարունակում է անկում ապրել նավթի գինը, որի վրա էլ հիմնված է Ադրբեջանի տնտեսությունը:
Ակնհայտ է, որ այս իրողությունները այդ երկրում կարող են առաջացնել լուրջ սոցիալական հուզումներ: Իսկ բոլոր նման դեպքերում Ադրբեջանը որպես կանոն դիմում է սեփական հանրության ուշադրությունը արտաքին ճակատում ռազմական գործողությունների վրա տեղափոխելու մարտավարությանը: Ռազմական սադրանքների դիմելու համար Ադրբեջանին կարող է մոտիվացնել նաև այն հաշվարկը, որ այս օրերին բոլոր պետությունները, այդ թվում ղարաբաղյան հակամարտության կարգավորմամբ շահագրգիռ գերտերությունները զբաղված են սեփական երկրներում կորոնավիրուսի համավարակի կանխարգելման խնդիրներով և հայ-ադրբեջանական կամ ղարաբաղաադրբեջանական սահմանին հնարավոր ռազմական գործողություններին պատճաշ և բավարար ուշադրություն չեն դարձնի: Այսինքն՝ Ադրբեջանի իշխանությունը կարող է մտածել, որ մի շարք պատճառներով հիմա բարենպաստ իրավիճակ է Հայաստանի կամ Արցախի ուղղությամբ ռազմական սադրանքների դիմելու համար:
Վստահաբար մեր զինված ուժերն ամբողջությամբ վերահսկում են իրադարձությունը և մենք հավելյալ մտահոգվելու կարիք չունենք: Պարզապես այս օրերին պետք է ավելացնել զգոնությունը՝ Ադրբեջանի հերթական հնարավոր արկածախնդրությունը թույլ չտալու համար: Զուգահեռաբար մեր արտաքին քաղաքական գերատեսչությունը պետք է ինտենսիվորեն աշխատի ԵԱՀԿ Մինսկի խմբի և խմբի անդամ պետությունների հետ՝ նրանց ուշադրությունը հրավիրելով Ադրբեջանի այս արկածախնդրության վրա: Որքան էլ միջազգային հանրությունը ներկայումս զբաղված է ազգային խնդիրների լուծմամբ, այդուհանդերձ համապատասխան կառույցները պետք է հետևեն հակամարտություններ ունեցող տարածաշրջաններին՝ հնարավոր ռազմական էսկալացիա թույլ չտալու համար:
Հ.Գ. Հերթական անգամ Ադրբեջանի կողմից կրակահերթեր են ուղղվել Հայաստանի Հանրապետության տարածքի ուղղությամբ: Այսինքն՝ Ադրբեջանը հերթական անգամ կրակել է ՀԱՊԿ-ի անդամ պետության տարածքին:
Բնականաբար, ինչպես նախկինում, այնպես էլ ու առավել ևս այսօր ՀԱՊԿ-ի կողմից որևէ արձագանք չկա, այն դեպքում, երբ Հայաստանի անվտանգության ապահովումը այդ կառույց պայմանագրային պարտավորություններից է:
Հասկանալի է, որ անգամ լուրջ չէ արդեն ՀԱՊԿ-ից որևէ արձագանք ակնկալելը, այդուհանդերձ Հայաստանի համապատասխան մարմինները պետք է համապատասխան ընթացակարգերով այս միջադեպի մասին տեղեկացնեն ՀԱՊԿ-ին՝ եթե ոչ այսօրվա, ապա ապագայում ՀԱՊԿ-ի ամորֆությունը արձանագրելու ու համարժեք հետևություններ անելու համար:
https://www.facebook.com/arman.babajanyan.92/posts/3338972392798535
