Արդեն մոտ մեկ ամիս է, ինչ ՀՀ «ՁԻԱՀ-ի կանխարգելման հանրապետական կենտրոն»-ի աշխատակիցները, սեփական դիմումների համաձայն, ազատված են աշխատանքից:
Աշխատանքից ազատման պատճառը ՁԻԱՀ-ի կենտրոնը «Նորք» ինֆեկցիոն կլինիկական հիվանդանոցին միացնելու որոշումն էր: Կենտրոնի աշխատակիցները օրեր շարունակ բողոքի ցույցերի միջոցով փորձում էին իշխանությունների ուշադրությունը կենտրոնացնել խնդրի վրա ու հիմնավորել, որ որոշումը սխալ է: Հիշեցնենք՝ առողջապահության նախարարի հրամանով՝ դադարեցվել է ՀՀ ԱՆ «ՁԻԱՀ-ի կանխարգելման հանրապետական կենտրոն» ՊՈԱԿ-ի տնօրեն Սամվել Գրիգորյանի աշխատանքային պայմանագիրը՝ աշխատանքային պարտականությունները ոչ պատշաճ իրականացնելու հիմքով: Որոշման հիմնավորման մեջ նշվում է, որ երկու կենտրոնների միացման նպատակը երկու ընկերությունների ռեսուրսների, հզորությունների, բժշկական սարքավորումների օգտագործման արդյունավետության և արտադրողականության բարձրացումն է։
Այս օրերին, երբ Հայաստանում շարունակվում է տարածվել նոր տեսակի կորոնավիրուսը՝ COVID-19, առողջապահության համակարգն առավել քան երբևէ ունի լավ ու որակյալ մասնագետների կարիք: Իսկ «ՁԻԱՀ-ի կանխարգելման հանրապետական կենտրոն»-ում այդպիսիք շատ էին: Բժշկական երկու կենտրոնների միացումից հետո 88 մասնագետ, սեփական դիմումի համաձայն, ազատվել է աշխատանքից: «Առաջին լրատվական»-ի հետ զրույցում «ՁԻԱՀ-ի կանխարգելման հանրապետական կենտրոն»-ի կանխարգելման բաժնի վարիչ Ժանետա Պետրոսյանը նշեց՝ հիմնական, առանցքային աշխատողներին աշխատանքից ազատել են:
Մեր զրուցակցի խոսքերով՝ եղել են բժիշկներ, վարակաբաններ, բուժքույրեր, որոնք գնացել են, փորձել են հետ ընդունվել, սակայն մերժում են ստացել: Այն հարցը, թե այս պահին «Նորք» ինֆեկցիոն հիվանդանոցում, պայմանավորված կորոնավիրուսային համավարակի տարածմամբ, բժիշկների պակաս կա, բժշկուհին նշեց.
«Ես Ձեզ ասեմ, որ մեր մերժված մասնագետների մի մասն այս պահին աշխատում են «Նորք» ինֆեկցիոնում, բուժքույրեր ունենք, որ այլ տեղեր ևս աշխատում են: Սակայն չգիտեմ, թե ինչ չափանիշներով են մեկին ընդունում, մյուսին մերժում: Ոմանց հետ ընդունել են, ոմանց՝ ոչ: Բայց թե ինչ հիմքով, չեմ կարող ասել: Կարող եք տնօրենի ժամանակավոր պաշտոնակատարին զանգել, ինքը բացատրություն տա, թե ինչու է ոմանց մերժել, ոմանց՝ ոչ»:
Կենտրոնի նախկին աշխատակիցը շեշտեց, որ իրենք միշտ էլ պատրաստակամ են աշխատել, իրենց մասնագիտական հմտություններն ու ծառայությունները տրամադրել: «Մենք ունենք մշտադիտարկման շատ լավ խումբ: Մենք ունենք շատ լավ համաճարակաբաններ, որոնք կարող էին կորոնավիրուսի էպիդեմիայի վերաբերյալ կանխատեսումներ, վերլուծություններ անել: Այդ ներուժը չի օգտագործվում: Դա բացարձակապես ոչ մեկին, կարծես թե, հետաքրքիր չէ:
Անկախ ամեն ինչից, ես ինքս, որպես կանխարգելման բաժնի վարիչ, չեմ կարող տանը հանգիստ նստել: Մենք մեր էջերում տարբեր օգտակար տեղեկություններ ենք տրամադրում, թե այս ընթացքում ՄԻԱՎ վարակակիրները ինչ պետք է անեն կորոնավիրուսից խուսափելու համար: Իմ և իմ գործընկերների մասնագիտական խիղճը թույլ չի տալիս, որ այդպես հանգիստ նստենք տանը ու հետևենք իրադարձություններին: Փորձում ենք մեր ներուժը, հնարավորությունները, գիտելիքները ամեն կերպ ծառայեցնել այս իրավիճակից դուրս գալու համար: Կատարում ենք վերլուծություններ, տարբեր աշխատանքներ: Չնայած պաշտոնապես աշխատանքից ազատված ենք, բայց տանն աշխատում ենք»,- ասաց «ՁԻԱՀ-ի կանխարգելման հանրապետական կենտրոն»-ի կանխարգելման բաժնի վարիչ Ժանետա Պետրոսյանը:
