Հայաստանի Հանրապետությունը շարունակում է ապրել արտակարգ դրության պայմաններում: Արտակարգ դրությամբ պայմանավորված սահմանափակումները տարածվում են նաև դատական համակարգի վրա:
Այսօր Ազգային ժողովն արտահերթ նիստում առաջին ընթերցմամբ ընդունել է «Արտակարգ դրության ռեժիմի մասին օրենքում լրացումներ կատարելու մասին և էլեկտրոնային հաղորդակցության մասին օրենքում լրացումներ կատարելու մասին» օրենքների փաթեթը:
Թեմայի շուրջ «Առաջին լրատվական»-ը զրուցել է փաստաբան Կարապետ Բադալյանի հետ:
Խորհրդարանի այսօրվա արտահերթ նիստի օրակարգը շատերի բնորոշմամբ խնդրահարույց է: Անգամ իշխող ուժի բոլոր պատգամավորները չէ, որ այս փաթեթի շուրջ միակարծիք են: Նախագծով առաջարկվում է նախատեսել, որ արտակարգ դրության ժամանակ եթե արտակարգ դրությունը համաճարակի հետևանքով ստեղծված արտակարգ իրավիճակով է պայմանավորված, կարող է միջամտություն իրականացվել նաև անձնական տվյալների պաշտպանության, մասնավոր ու ընտանեկան կյանքի անձեռնմխելիության, հաղորդակցության ազատության և գաղտնիության իրավունքներին:
Արդարադատության նախարար Ռուստամ Բադասյանը հայտարարել է, որ ընդունված նախագծը, որը հնարավորություն է տալիս կորոնավիրուսով վարակված անձանց կոնտակտավորներին բացահայտելու նպատակով ֆիքսել զանգերը, չի ենթադրում որևէ խոսակցության ձայնագրում կամ որևէ այլ բովանդակության բացահայտում:
Կարապետ Բադալյանը, անդրադառնալով հարցին, թե արդյոք այս գործընթացն ամբողջությամբ իրավական է, ընդգծեց, որ և՛ ՀՀ Սահմանադրությունը, և՛ միջազգային իրավական նորմերը հնարավորություն են տալիս որոշակի պայմանների առկայությամբ իրավունքները սահմանափակել: «Այդ սահմանափակումները չպետք է լինեն ինքնանպատակ, այլ պետք է հետապնդեն իրավաչափ նպատակ և համաչափ լինեն հետապնդվող նպատակին»,- նշեց փաստաբանը՝ հավելելով նաև, որ հսկողությունը պետք է մեծ լինի, որպեսզի վարակի փոխանցումը հնարավորինս կասեցվի:
Մեր զրուցակիցը նաև ընդգծեց, որ կորոնավիրուսի ճգնաժամի հաղթահարմանը զուգընթաց՝ ԱԺ-ն չպետք է հապաղի ու պետք է լուծի ՍԴ հարցը:
Մանրամասն՝ տեսանյութում: