Նոր կորոնավիրուսի համավարակի պայմաններում չափազանց կարևոր է վերահսկել վիճակը հատկապես փակ հաստատություններում։
Օրերս Դուք եղել եք «Նուբարաշեն» ՔԿՀ-ում, որից հետո այցելեցիք «Դատապարտյալների հիվանդանոց» ՔԿՀ։ Ի՞նչ խնդիրներ արձանագրեցիք այս այցելությունների ընթացքում․ «Առաջին լրատվական»-ի հարցին ԱԺ պատգամավոր Արման Բաբաջանյանը պատասխանեց․ «Նախ՝ կարևոր է արձանագրել՝ ՔԿՀ-ների ընդհանուր վարչությունը համալիր աշխատանքներ է ներկայացնում այս համավարակի կանխարգելման ու տարածման դեմ, և դա չափազանց կարևոր է։ Ես ականատես եղա այդպիսի կատարված, ամբողջացած աշխատանքներին «Նուբարաշեն» ՔԿՀ-ում, ամբողջությամբ շրջեցի բոլոր հարկերում, պատահականության սկզբունքով մի քանի խցերի դատապարտյալների հետ զրուցեցի և համոզվեցի, որ կատարվող աշխատանքները բավական լավ են կազմակերպվել։ Այսինքն՝ դատապարտյալները դուրս են բերվել խցերից, և այնտեղ ախտահանվող այդ ամբողջ միջոցառումներն իրականացվել են, որից հետո նոր նրանք վերադարձել են իրենց խցեր։
Նույնը չեմ կարող ասել «Դատապարտյալների հիվանդանոց» ՔԿՀ-ի վերաբերյալ։ Պետք է ասեմ, որ այնտեղ մտահոգիչ իրավիճակ է՝ կապված հիվանդների հետ։ Հիվանդներ կան, որոնց գտնվելն անազատության մեջ՝ առավել ևս այս համավարակի սպառնալիքի պայմաններում, կարծում եմ՝ անընդունելի է, և նրանց կալանքն անհամատեղելի է նրանց առողջական վիճակի հետ։ Նրանք չափազանց խոցելի խմբի մեջ են, և այդ իմաստով, ես կարծում եմ, որ պետք է աշխատանքներ տարվեն։ Ես խոսել եմ Մարդու իրավունքների պաշտպանի հետ, և նա պատրաստակամություն է հայտնել, որպեսզի առանձին դեպքերով մենք ուսումնասիրենք, թե ում նկատմամբ կարող ենք խափանման միջոց փոխել, կամ նրանց արձակուրդի հնարավորություն ընձեռել։ Ես այսօր հանդիպել եմ ՔԿ ծառայության պետ Արթուր Գոյունյանի հետ, մոտավորապես գույքագրել ենք հիմնական խնդիրները»։
Մանրամասները՝ տեսանյութում։
