Մինչ այժմ փաստացիորեն կորոնավիրուսով մահացել է 9-ը իրանահայ, որոցից 5-ի մոտ փաստորեն դրական է եղել կորոնավիրուսի թեստի պատասխանը, իսկ կասկածելի են համարվել 4-ը: Այս մասին «Առաջին լրատվական»-ի հետ զրույցում նշեց Թեհրանի «Արաքս» շաբաթաթերթի գլխավոր խմբագիր Մեվսես Քեշիշյանը:
Ընդ որում, նրա խոսքով, մահացածներից 3-ը տարիներ շարունակ տառապել են խրոնիկ հիվանդությամբ:
«Մահացածներից ամենատարեցը 94-ամյա կին է: Մյուսներն են 83-ամյա կին, 80-ամյա տղամարդ, հինգը՝ 65-75 տարեկան են, մեկը՝ կին, չորսը՝ տղամարդ, և մեկ 57-ամյա տղամարդ: Ավելացնեմ, վերոնշյալ հանգուցյալներից 8-ը թաղվել են առողջապահական պրոտոկոլային նորմերը հաշվի առնելով, 9-րդ մահացածը դեռ չի թաղվել»,-ասաց Քեշիշյանը:
Նա տեղեկացրեց, որ Իրանում կորոնավիրուսով վարակվածների ընդհանուր թիվն այսօր 38309 է, վերջին 24 ժամում հայտնաբերվել է 2901 նոր դեպք: Ցայժմ մահացել են 2640 հոգի՝ 123-ը վերջին 24 ժամվա ընթացքում: Բուժվել և հիվանդանոցից դուրս են գրվել 12391 հոգի, 3467 հոգու վիճակը ծայահեղ ծանր է գնահատվում:
Վարակվածների միջին տարիքը 55 է, մահացածներինը 69-ը: