Կորոնավիրուսով վարակված մարդկանցից ծայրահեղ ծանր վիճակում է մեկը, տասնչորսի վիճակը, ըստ բժիշկների, ծանր է:
Առողջապահության նախարար Արսեն Թորոսյանն այսօր Կառավարության նիստի մեկնարկին ասաց, որ ծայրահեղ ծանր վիճակում գտնվող մարդու, ինչպես նաև ծանր դեպքերից երկուսի առողջությունը բարելավվում է:
Նախարարի խոսքով, կորոնավիրուսի համաշխարհային վիճակագրությունը վկայում է, որ եթե բանը հասնում է վերակենդանացման բաժանմունքին, ապա այս դեպքերի 50 տոկոսին միացվում է արհեստական շնչառության սարք, ինչը շատ ծանր փուլ է, քչերի կյանքն է հաջողվում փրկել. – «Իհարկե մեր թվերը փոքր են, և կանխատեսում անել մեր թվերի վրա դժվար կլինի: Ամեն կոնկրետ դեպքը ինդիվիդուալ է: Օրինակ, ունենք նաև ծանր, որը երիտասարդ է, սակայն մեծ հավանականությամբ կդադարի ծանր լինել, միջին կդառնա շուտով և հետո ամբողջությամբ կապաքինվի: Ամեն կոնկրետ պացիենտի քրոնիկական հիվանդություններն են ի վերջո որոշում ելքը: Որովհետև առանց քրոնիկական հիվանդությունների պացիենտները հիմնականում նույնիսկ չեն հասնում ռեանիմիացիոն ծառայությանը: Բացի մեկից, որը պարզապես ուշ է դիմել բուժհաստատություն, մենք մի քիչ ուշ են ախտորոշել, երիտասարդ է ինֆիլտրատիվ երկկողմանի թոքաբորբ ունի: Եթե մի քիչ շուտ դիմեր, հնարավոր է, ինքն էլ հասած չլիներ ռեանիմիացիա»: