Վրաստանում կորոնավիրուսով վարակվածների թիվը հասել է 91-ի, հաղորդվում է հիվանդության մոնիտորինգի հատուկ կայքում:
Վրաստանի իշխանությունները արտակարգ դրություն են սահմանել մինչև ապրիլի 21-ը՝ կորոնավիրուսի տարածման պատճառով: Արտակարգ դրությունը ենթադրում է մի շարք սահմանափակումներ կապված տեղաշարժի հետ, ավելի քան 10 մարդու կուտակման դեպքում պատժամիջոցներ կկիրառվեն: Կիրակի կեսօրին երկրում գրանցվել է կորոնավիրուսային վարակի 90 դեպք:
«Հաստատված է վարակի 91 դեպք, ապաքինվել են 18-ը, 4717 մարդ կարանտինացված է, 268-ը գտնվում են հսկողության տակ»,- հաղորդվում է կայքում:
Վարակվածների թվում կան երեխաներ, հղի կին և Ազգային գվարդիայի քաղաքացիական գրասենյակի աշխատակիցներ: Վրաստանի Հիվանդությունների վերահսկման և հանրային առողջության ազգային կենտրոնի ղեկավար Ամիրան Գամկրելիձեն լրագրողներին ասել է, որ երկիրը «կորոնավիրուսի զսպման» փուլից անցել է «ներքին տարածման» փուլին, դրանով իսկ COVID-19-ի լայնամասշտաբ համաճարակի մեծ վտանգ կա: