Եկեղեցին բոլոր իրավիճակներում ունի մեկ անելիք՝ հոգ տանել իր հոտի հոգևոր, նաև ֆիզիիկական անվտանգության համար: Այս մասին «Առաջին լրատվական»-ի հետ զրույցում նշեց Շիրակի թեմի առաջնորդ Տ. Միքայել եպիսկոպոս Աջապահյանը՝ անդրադառնալով կորոնավիրուսի հետ կապված իրավիճակին և նրան, որ Եկեղեցին որոշել է պատարագները օնլայն հեռարձակել:
Նրա խոսքով, իրավիճակները կարող են փոխվել, բայց եկեղեցու առաքելությունը չի փոխվում. «Մարդկանց առաջնորդելու դեպի հավիտենական փրկությունմիմյանց նկատմամբ սիրո, համերաշխության մթնոլորտի մեջ: Այսպիսի մարտահրավերներ շատ են եղել, անցել-գնացել եկեղեցու պատմության մեջ: Իհարկե, մեր սերնդի եկեղեցականների համար սա առաջին դեպքն է, տա Աստված վերջինը լինի, բայց մենք շարունակում ենք մեր առաքելությունն իրականացնել այնքանով, որքանով ի վիճակի ենք և որքանով դիմացինը պատրաստակամ է դա ընդունելու և կարևորելու»,-ասաց Աջապահյանը:
Նա հավելեց, որ ժողովուրդը հոգևոր իմաստով բավական պատրաստ է այս իրավիճակին. «Ես ժողովրդի մեջ տեսնում եմ լավատեսություն, որը հոգևոր որակ է, տեսնում եմ շատերի մոտ միմյանց օգնելու պատրաստակամություն և համերաշխություն, որը նույնպես հոգևոր որակ է: Նաև տեսնում եմ շատերի մոտ այս վիճակը Աստուծով հաղթահարելու կամք, ոչ թե առանց Աստծո»: