Ռումինիայում մարդկանց առաջարկել են կորոնավիրուսի կարանտինն անցկացնել Պելեշ ամրոցում: Այսպիսի նախաձեռնությամբ է հանդես եկել երկրի Թագավորական տունը Facebook-ի իր էջում:
«Կապված Ռումինիայում արտակարգ դրության հայտարարության հետ` Թագի պահապանը և նրա քույրը ազգային կոմիտեին անվճար կտրամադրեն 53 տեղ համարներում և Պելեշի տարածքի ամառանոցներում ապրելու համար նրանց, որոնց կարանտին է անհրաժեշտ»,- ասվում է հաղորդագրության մեջ:
Բացի դրանից, թագավորական ընտանիքը բացել է հատուկ հիմնադրամ օգնելու համար տարեց քաղաքացիներին, որոնք կորոնավիրուսի համավարակի պայմաններում պարտավոր են հետևել ինքնամեկուսացման ռեժիմին: Հավաքված գումարը կծախսվի առաջին անհրաժեշտության ապրանքներ գնելու, հոգեբանների և տան ծառայությունների համար:
Պելեշ հայտնի ամրոցը գտնվում է Բուխարեստից 124 կմ հեռավորության վրա: Սովորական ժամանակներում այն գործում է որպես թանգարան: Այցելուները կարող են դիտել 160 սենյակներից միայն 35-ը, մնացածները փակ են նրանց համար: