Իտալիայի նախագահ Սերջիո Մատարելան դիմել է ժողովրդին՝ երկրում կորոնավիրուսի վարակի պատճառով տիրող իրավիճակի կապակցությամբ։ Նա կոչ է արել ճիշտ գնահատել COVID-19-ի վտանգը, «քանի դեռ ուշ չէ»։
Իր ելույթում նա նշել է, որ Իտալիան և աշխարհը «պատմության տխուր էջն են ապրում», իսկ մարդիկ դրա համար «շատ թանկ են վճարում»։ Եվ դրա պատճառը կորոնավիրուսն է։ Մատարելան ասել է, որ երկրին նոր նախաձեռնություններ են անհրաժեշտ, որոնք կփոխեն վարակի դեմ պայքարի հին մեխանիզմները։
«Ես հուսով եմ, որ բոլորն են գիտակցում Եվրոպայի համար սպառնալիքի լրջությունը, քանի դեռ ուշ չէ», նրա խոսքերն է մեջբերում ՌԻԱ «Նովոստին»։
Նրա խոսքերով, անգամ նոր դեպքերի աճի նվազումը չի կարող սփոփել Իտալիային, քանի որ խոսքը գնում է ամեն օր նոր հիվանդների և մահերի մասին։
Հիշեցնենք, որ մինչև օրս Իտալիայում կորոնավկիրուսով վարակվելու 96 հազար դեպք է գրանցվել և ավելի քան 9 հազար մահ։