Թուրքիայում կորոնավիրուսով վարակված հայեր կան, մոտ 10 հոգի, սակայն նրանցից որևէ մեկի կյանքին սպառնացող վտանգ չկա։ Այս մասին «Առաջին լրատվական»-ի հետ զրույցում ասաց Ստամբուլի «Ակոս» շաբաթաթերթի հայկական բաժնի խմբագիր Բագրատ Էստուկյանը՝ հավելելով, որ «Ակոսին» հաճախ թղթակցող կանանցից մեկն էլ է վարակվել կորոնավիրուսով։ Էստուկյանը նշեց, որ այս պահին Թուրքիայում կորոնավիրուսի հետևանքով պաշտոնապես մահացել է 75 հոգի, բայց այս թիվն առաջիկայում դեռ կաճի։
«Այս թիվը պաշտոնական հայտարարված թիվն է, ոչ թե իրականը։ Կանխամիջոցները քայլ առ քայլ են իրականացվում, փողոց դուրս գալն արգելված չէ, արգելված է միայն իմ տարեկիցների համար, այսինքն՝ 65 տարեկանը լրացածներին արգելվում է դուրս գալ փողոց։ Շուկաները, սննդի կենտրոնները գործում են, փակ են հագուստի, խաղալիքների խանութները։ Պատմական փակ շուկան հիմա իսկապես փակ շուկա է դարձել, այն կարևոր տնտեսական կենտրոն էր, որ այս օրերին փակվել է։ Այս անցուդարձը տնտեսությունը ծանր է տանում»,-ասաց Բագրատ Էստուկյանը։ Նա նկատեց, որ հատկապես դժվարացել է աշխատող խավի վիճակը, քանի որ Թուրքիայում մի մեծ հատված կա, որ ամենօրյա աշխատանքով իր ապրուստն էր հայթայթում, և հիմա պետությունը որևէ կերպ չի օժանդակում նրան։ Պետությունը միջոցառումներ է իրականացնում մեծ ընկերությունները փրկելու համար, իսկ ժողովրդի մասին մտածող չկա։
«Հասարակության բնականոն կյանքն է խաթարված։ Խաթարվել է հոգեբանությունը, մարդիկ տագնապած են։ Սա ճգնաժամ է, մարդիկ պետության հայտարարություններին չեն հավատում, գիտեն, որ վարակը շատ ավելի է տարածված, քան այն, որ հայտարարվում է։ Որ հիվանդանոց դիմում ենք, տեսնում ենք՝ 20-25 բուժվող կա, մինչդեռ պետությունը այլ թիվ է հայտարարում»,- ասաց Էստուկյանը։
Պոլսո հայոց պատրիարքարանը միջոցառումներ է իրականացնում համայնքին օգնելու համար։ Հիմա կամավորների խմբեր են ձևավորվել, որպեսզի միայնակ տարեցների կարիքները հոգան, առևտուր անեն, հասցնեն նրանց։
«Այս պահին արտակարգ դրություն հայտարարված է միայն տարեցների համար։ Այս գործընթացը հայտնի է, որ մինչև ապրիլի վերջ անխափան պետք է գնա, դպրոցները հայտարարել են, որ մինչև ապրիլի վերջ փակ պետք է մնան։ Հիմա խոսվում է այն մասին, որ այս ճգնաժամը հնարավոր է շարունակվի մինչև հունիսի վերջ»,- հավելեց նա։
Նա նշեց, որ Ստամբուլում նոր գերեզմանոց են կառուցում հատուկ կորոնավիրուսից մահացածներին թաղելու համար. «Դրա համար մտածում ենք, որ թվերը մեծ են, քան հայտարարում են։ Առողջապահության նախարարությունն ամեն օր թիվ է հայտարարում, բայց այս թվերը արժանահավատ չեն։ Այս նոր գերեզմանում 30 հոգի արդեն թաղված են»։
Ստամբուլի օդանավակայանը դադարել է գործել. Էստուկյանի խոսքով՝ ո՛չ եկող կա, ո՛չ գնացող, իսկ մանրածախ առևտուրը զբոսաշրջիկների շնորհիվ էր կայանում, հիմա բոլորը մնացին անգործ, որևէ մեկը աշխատանք չունի։
