«Ռուսաստանի Դաշնությունից ցորենի ներկրման խնդիր իսկապես կա։ Բայց խնդիրները ավելի շատ քաղաքական են, քան կորոնավիրուսի վարակի տարածմամբ պայմանավորված»,- «Առաջին լրատվական»-ի հետ զրույցում ասաց ՌԴ-ից ցորենի ներկրմամբ զբաղվող Տարոն Ստեփանյանը։
Հիշեցնենք, որ երեկ Ազգային ժողով-կառավարություն հարցուպատասխանի ժամանակ փոխվարչապետ Մհեր Գրիգորյանն անդրադարձավ հարցին, որ Ռուսաստանն արգելել է իր երկրից հացահատիկի արտահանումը։ Հարցին, թե որքանո՞վ է դա խնդիր առաջացնում Հայաստանի պարենային ապահովվածության տեսանկյունից, նա պատասխանեց․«Իրոք խնդիր առաջացրել էր, հարցը մենք բարձրացրել ենք ԵԱՏՄ հարթակում, այսօր նիստը եղել է, պայմանավորվածություն է եղել, որ նման իրավիճակները կբացառվեն։ Ուղղակի ռուսական կողմը խնդիր է դնում, որպեսզի այդ դեպքում ԵԱՏՄ տարածքում, այսինքն՝ մենք յուրաքանչյուրս մեր սահմանի համար արտահանման արգելքներ դնենք, որպեսզի չստացվի, որ ԵԱՏՄ երկրի միջոցով գնում է երրորդ երկիր։ Այդ հարցը ամսի երեքին վերջնականապես կպայմանավորվենք»։
Մեր զրուցակից ներկրողի խոսքերով՝ այնպես չէ, որ Ռուսաստանը չի ցանկանում, որ իր տարածքից ցորեն արտահանվի, պարզապես խնդիրն այն է, որ նավթի ու առհասարակ աշխարհում տիրող զարգացումների պատճառով ռուբլու կուրսը նվազեց, իսկ դոլարինը՝ բարձրացավ։ Հատկապես ռուբլու կուրսի նվազման պարագայում Հայաստանից արագ ռուբլի գնեցին և գնացին Ռուսաստանից ցորեն բերելու։ Սակայն Ռուսաստանն էլ այս պարագայում ցորենի գինը բարձրացրեց, ու Հայաստանից մեկնած ներկրողները կանգնեցին փաստի առաջ։ «Այսինքն՝ ներկրումը կանգնեց ռուբլու արժեզրկման և Ռուսաստանում ցորենի գնի բարձրացման հետևանքով»,- ասաց մեր զրուցակիցը՝ հավելելով, որ ստեղծված իրավիճակում էլ ռուսական կողմը շատ դանդաղ է աշխատում, 1 ժամվա մեջ միայն 1 մեքենա է անցնում, բայց այն մեքենաները, որոնք հայկական համարներով չեն, և հայ վարորդներ չեն, մաքսատուն են մտնում շատ արագ, ցորենը դատարկում են Հայաստանի գործարաններում, պահեստներում և արագ հետ են գնում։ «Բայց մաքսատանը հիմա հարյուրավոր մեքենաներ կան կանգնած, ու բոլորը հայ վարորդներ են։ Հայ վարորդները կանգնած են, բայց օսերը անցնում են։ Մաքսակետից մինչև Նոյեմբերյան քաղաք մեքենաներ են։ Անունը դրել են՝ վիրուսն է պատճառը, և այդ օսը պետք է վերադառնա իր երկիր, բայց բոլորս էլ հասկանում ենք, որ սա առևտուր է, քաղաքական հարց է, քանի որ եթե պատճառը վարակն է, ապա ինչու են թույլ տալիս, որ այս օսն իր մաքսակետից գա Հայաստան, ապա հետ գնա իր երկիր։ Նույն կերպ էլ Վրաստանն է ասում։ Մեզ ասում են՝ կարող եք գալ Վրաստանից գնել ցորեն, կամ գնաք Բաթումից գնեք ու հետ գաք, բայց երրորդ պետություն չենք կարող գնալ։ Ամեն օր լսում ենք, որ բեռնատարների համար Լարսը բաց է, բայց դա ուղղակի արտահայտություն է, քանի որ շարժ բացարձակ չկա»,- ասաց մեր զրուցակիցը։
Ստեփանյանի խոսքերով՝ այնպես չէ, որ այսօր Ռուսաստանից Հայաստան ցորեն չի ներկրվում։ Ներկրվում է, բայց այդ ներկրումը չեն իրականացնում հայերը, Հայաստանի սուբյեկտները, հայ բիզնեսմենները։ «Օրինակ՝ ես 60 մեքենա ունեմ ու ներկրում չեն կարողանում իրականացնել, բայց դա անում են օսերը և վրացիները։ Քաղաքական պատճառներ են։ Աժիոտաժը քաղաքական ու առևտրային է, այլ ոչ թե վիրուսը։ Բացի դրանից՝ ամբողջ աշխարհում գործը կանգնել է, և իրենք էլ էս բիզնեսում աշխատեցնում են իրենց տեխնիկան, իրենց աշխատուժն ու իրենց ցորենը։ Ստեղ ամեն ինչ թելադրում է ռուսը։ Իրենք եթե ուզենան, հենց առավոտ շուտ այդ հարցը կլուծեն»,- ասաց նա՝ հավելելով, որ ճգնաժամային իրավիճակում անհասկանալիորեն աճել են նաև բեռնափոխադրումների գները, քանի որ պահանջարկը մեծացել է։ «Այնպես չէ, որ այս իրավիճակում պարենային անվտանգությանը սպառնացող վտանգ կա, բայց խնդիր, այնուամենայնիվ, կա»,- եզրափակեց մեր զրուցակիցը։