Կորոնավիրուսը չի ճանաչում ո՛չ սահմաններ, ո՛չ տարիք, ո՛չ սեռ, ո՛չ էթնիկ պատկանելություն: Եվ համաճարակի տարածումը կանխարգելելու միակ միջոցը դեռևս ինքնամեկուսացումն է: Հայաստանի ողջ տարածքում կորոնավիրուսի տարածումը կանխելու նպատակով մինչև մարտի 31-ը սահմանափակվում է մարդկանց ազատ տեղաշարժը: Ի՞նչ իրավիճակ ունենք այսօր այդ առումով: Որքանո՞վ են մեր քաղաքացիները հետևում պարետի ցուցումներին:
Թեմայի շուրջ «Առաջին լրատվական»-ը զրուցել է ՀՀ ոստիկանության իրավաբանական վարչության պետ Մանուկ Մուրադյանի հետ:
«Ամբողջ աշխարհը կանգնել է այս խնդրի առաջ: Ստեղծվել է մի իրավիճակ, երբ պետական կառավարման՝ հանրային իշխանության մարմինների գործելակերպը պետք է զուգակցվի քաղաքացիների բարեխղճության և պարտաճանաչության հետ:
Հայաստանում հայտարարված է արտակարգ դրություն և օրենքով նախատեսված կարգով ձեռնարկվում են միջոցառումներ: Սահմանադրական կարգին իրական սպառնալիք կար, և արտակարգ իրավիճակի խնդիրներ էին առաջանում: Սահմանադրության Սահմանադրական կարգի հիմունքներ գլխի երրորդ հոդվածը մարդուն հռչակում է որպես բարձրագույն արժեք, և ինքնին իշխանությունների առջև պարտականություն է դրվում պահպանել կարևորագույն արժեքի՝ մարդու իրավունքների, ազատությունների անխափան իրացումը: Ոստիկանությունը անմասն չի կարող լինել, արտակարգ դրության իրավական ռեժիմին անմիջական մասնակցություն ունի: Կիրառվում է հատուկ մեթոդաբանություն: Պարետի կողմից բազմաթիվ ցուցումներ և որոշումներ են կայացվել, որոնք ուղղված են քաղաքացիների շփումը նվազեցնելուն՝ այս աղետը հնարավորինս արագ հաղթահարելու նպատակով»,- նշեց Մանուկ Մուրադյանը:
Մեր զրուցակիցը հավաստիացրեց, որ ոստիկանությունն ունի բավարար ռեսուրս արտակարգ դրության պայմաններում իրավիճակը վերահսկելու համար: Ոստիկանության պաշտոնյան տեղեկացրեց, որ 460 մարդ այսօր խախտել է ինքնամեկուսացման ռեժիմը, նա նաև հավելեց, որ քաղաքացիները դեռևս արտակարգ դրության պայմաններին հարմարվելու խնդիր ունեն:
Մանրամասն՝ տեսանյութում:
