ՀՀ բոլոր քաղաքացիների մասին Հայաստանի կառավարությունը մտածում է, մշակվում են գործողությունների ծրագրեր, որոնց արդյունքում բոլորս, և կառավարությունը, և քաղաքացիները նվազագույն կորուստներ պետք է ունենք: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Գևորգ Պապոյանը՝ անդրադառնալով ԼՀԿ ղեկավար Էդմոն Մարուքյանի քննադատությանը, որ օրավարձով աշխատող մարդիկ մնացել են առանց աշխատանքի և պետությունն այդ ուղղությամբ ոչինչ չի անում:
«Այս օրերին բոլորս ստեղծված իրավիճակում պետք է ըմբռնումով մոտենանք: Այո, տնտեսական լավ թափը, որը կար, մասնավորապես, փետրվարին 8 տոկոս տնտեսական ակտիվության ցուցանիշ ենք ունեցել, ակնհայտ է, որ մարտին դա չի լինի: Առաջիկա ամիսներին մենք որոշակի ցածր տնտեսական աճի ռեժիմում կլինենք: Բայց մենք պետք է հասկանանք, որ աշխարհի շատ երկրներում ռեցեսիա է լինելու, այսինքն իրենց ՀՆԱ-ն կրճատվելու է, հետևաբար, մենք այս առումով շատ ավելի լավ վիճակ է լինելու, մենք տնտեսական աճ ենք արձանագրելու»,-ասաց նա:
