Քաղաքացին ենթարկվելու է քրեական պատասխանատվության, եթե նրա կողմից տեղաշարժման խախտումը առաջացրել է այլ անձնի կամ անձանց վարակում։
Մարտի 25-ի մամուլի ասուլիսի ժամանակ այս մասին ասաց Հակակոռուպցիոն և քրեակատարողական քաղաքականության մշակման վարչության պետ Արփինե Սարգսյանը։
«Եթե անձի տեղաշարժման կանոնի խախտման հետևանքով անզգուշությամբ գրանցվել է այլ անձի վարակում, ապա այս դեպքում վրա է հասնելու ոչ թե վարչական, այլ քրեական պատասխանատվություն։ Նախատեսել ենք այս հանցակազմի համար ծանրացնող հանգամանքներ։ Եթե խախտման հետևանքով առաջացել է երկու կամ ավելի անձի վարակում, կամ դրա հետևանքով մարդու մահ, ապա սա ևս ենթակա է լինելու քրեական պատասխանատվության»,- ընդգծեց Սարգսյանը։
ՀՀ կառավարությունը Հայաստանում արտակարգ դրություն հայտարարելու որոշում է ընդունել: Որոշումը կայացվել է գործադիրի մարտի 16-ի նիստում՝ հաշվի առնելով աշխարհում և Հայաստանում նոր տիպի կորոնավիրուսի տարածման և այն Առողջապահության համաշխարհային կազմակերպության կողմից պանդեմիա որակվելու հանգամանքը: «Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն հայտարարել արտակարգ դրություն»,-նշված է ՀՀ կառավարության որոշման մեջ: Մարտի 24-ի ժամը 23:59-ից մինչև մարտի 31-ը, ժամը 23:59-ն ՀՀ ամբողջ տարածքում սահմանափակվում է մարդկանց ազատ տեղաշարժվելու իրավունքը: