ԱԺ-ն այսօր ընդունել է մի շարք նախագծեր, մերժել`2-ը: Ինչ վերաբերում է երեկ քննարկված նախագծերի քվեարկություններին՝
1.Կառավարության կողմից ներկայացված «Պետական տուրքի մասին» օրենքում լրացում կատարելու մասին» օրենքում փոփոխություն կատարելու մասին նախագիծն ընդունվեց 88 կողմ, 16 դեմ, 1 ձեռնպահ ձայներով, դեմ էր «Լուսավոր Հայաստան» խմբակցությունը:
Սա ցեմենտի համար ներմուծման տուրք սահմանելու մասին հարցը երկարաձգելու մասին նախագիծն էր: Այն ԱԺ-ը քննարկում է հատուկ ընթացակարգով, այսինքն` երկրորդ ընթերցումը կկազմակերպվի առաջինից հետո 24 ժամվա ընթացքում:
2. Կառավարության կողմից ներկայացված «Քաղաքաշինության մասին» Հայաստանի Հանրապետության օրենքում լրացում կատարելու մասին հարցը երկրորդ ընթերցմամբ ընդունվեց 110 կողմ ձայներով,
3. «Հիմնադրամների մասին» օրենքում փոփոխություններ և լրացում կատարելու մասին հարցն ընդունվեց միաձայն,
4. «Հասարակական կազմակերպությունների մասին» Հայաստանի Հանրապետության օրենքում փոփոխություններ կատարելու մասին հարցը երկրորդ ընթերցմամբ ընդունվեց 96 կողմ, 16 դեմ ձայներով,
5. «Լուսավոր Հայաստան» խմբակցության կողմից ներկայացված «Հայաստանի Հանրապետության հարկային օրենսգրքում լրացում կատարելու մասին» հարցը չընդունվեց, «Իմ քայլը» դեմ քվեարկեց,
76 դեմ, 34 կողմ 2 ձեռնպահ ձայներով քվեարկությունից հետո Մանե Թանդիլյանի առաջարկությամբ այն վերադարձվեց գրավոր առաջարկների ստացման փուլ, այսինքն` հանձնաժողովը մեկ անգամ ևս կքննարկի նախագիծը:
6. «Էներգախնայողության և վերականգնվող էներգետիկայի մասին» Հայաստանի Հանրապետության օրենքում փոփոխություն և լրացում կատարելու մասին նախագիծն ընդունվեց միաձայն,
7. «Տեղական ինքնակառավարման մասին» Հայաստանի Հանրապետության օրենքում փոփոխություն և լրացում կատարելու մասին նախագիծը 36 կողմ, 77 դեմ ձայներով չընդունվեց,
8. Կառավարության կողմից ներկայացված «Տեղական ինքնակառավարման մասին» օրենքում լրացում կատարելու մասին» և ««Հայաստանի Հանրապետության բյուջետային համակարգի մասին» օրենքում լրացում կատարելու մասին» նախագծերի փաթեթն ընդունվեց միաձայն,
9. Արթուր Հովհաննիսյանի ներկայացրած «Գովազդի մասին» նախագիծը երկրորդ ընթերցմամբ ընդունվեց 114 կողմ, 1 դեմ, 1 ձեռնպահ ձայներով,
10. «Հայաստանի Հանրապետության վարչատարածքային բաժանման մասին» Հայաստանի Հանրապետության օրենքում փոփոխություններ և լրացումներ կատարելու մասին հարցն ընդունվեց 85 կողմ, 21 դեմ, 10 ձեռնպահ ձայներով,
11. Մխիթար Հայրապետյանի, Նաիրա Զոհրաբյանի, Հարություն Բաբայանի ներկայացրած «Կրթության մասին» Հայաստանի Հանրապետության օրենքում փոփոխություն և լրացում կատարելու մասին նախագիծը ևս ընդունվեց,
12. Ալեն Սիմոնյանի ներկայացրած «Օտարերկրացիների մասին» օրենքում լրացում կատարելու մասին նախագիծն ընդունվեց միաձայն,
13. «Լիցենզավորման մասին» Հայաստանի Հանրապետության օրենքում փոփոխություն կատարելու մասին նախագիծն ընդունվեց 79, 33 դեմ, 2 ձեռնպահ ձայներով:
Վերջին քվեարկությունը «Բարգավաճ Հայաստան» խմբակցության քարտուղար Արման Աբովյանը բացատրեց հետևյալ կերպ.
«Մեր խմբակցությունը դեմ քվեարկեց, քանզի կարծում ենք, որ ստեղծված նոր տնտեսական իրավիճակում տեսնում ենք վտանգներ, որ նախագիծը կարող է հագեցնել լարվածության»: