Նոր տեսակի կորոնավիրուսի տարածումը երկրում կանխելու նպատակով հայտարարված արտակարգ դրության պայմաններում մարզերում ևս խիստ հսկողություն է սահմանված։ «Առաջին լրատվական»-ի հետ զրույցում Շիրակի մարզպետ Տիգրան Պետրոսյանը տեղեկացեց, որ մարզում լայնածավալ աշխատանքներ են իրականացնում։
Մարզպետի խոսքերով՝ մարզում լուրջ, ճգնաժամային իրավիճակ չկա։ «Բոլոր սեգմենտները՝ ոստիկանությունը, շտապը օպերատիվ աշխատում են։ Այս պահին լուրջ, ճգնաժամային իրավիճակ մարզում չունենք»,- ասաց մարզպետը։ Նրա խոսքերով՝ Հայաստան ժամանողները օդանավակայանից մեկուսացվում են կամ ինքնամեկուսացման են ենթարկվում։
«Ինֆեկցիոն հիվանդանոցում մեկուսարան ունենք, որտեղ նաև նմուշառում է տեղի ունենում։ Բացի դրանից՝ ունենք նաև ինքնամեկուսացման ցուցումով քաղաքացիներ։ Վերադարձողների տվյալները ևս շարունակաբար ստանում ենք։ Տվյալները ոստիկանության մոտ են նաև։ Իրականացվում է հետևողական աշխատանք»,- մանրամասնեց մարզպետը։ Նրա խոսքերով՝ ինքնամեկուսացման կամ տանը մնալու ռեժիմը խախտողների թիվը մեծ չէ, մարդիկ հետևում են ինքնամեկուսացման կոչերին։ «Մեծ մասը, պատկերացրեք, պահպանում են։ Մեծ մասի հետ կապված մենք խնդիր չունենք։
Իհարկե, մարդիկ կան, ովքեր հիվանդության լրջությունը իրենց ու իրենց շրջապատի մարդկանց համար չեն գիտակցում։ Միշտ լինում է սեգմենտ, որի համար իրավիճակը որոշակի առումով լուրջ չի ընկալվում։ Մենք ակնկալում ենք, որ մարդիկ ավելի լուրջ կընկալեն իրավիճակը»,- ընդգծեց մարզի ղեկավարը։
Նախօրեին ԱԺ ԲՀԿ խմբակցության ղեկավար Գագիկ Ծառուկյանը խորհրդարանում լրագրողների հետ զրույցի ընթացքում հայտարարել էր, թե Գյումրիում կորոնավիրուսի հաստատված 20 դեպք կա, ինչի կապակցությամբ իրենք գումար են փոխանցել Գյումրու ինֆեկցիոն հիվանդանոցին։ Այս տեղեկությունների մասով մարզպետը դժվարացավ որևէ բան ասել։ Առհասարակ, մարզում տիրող իրավիճակի վերաբերյալ մարզպետ Տիգրան Պետրոսյանը որևէ թիվ հայտնել չկարողացավ։ Նշենք, որ մինչ այս պահը որևէ պաշտոնական հաստատում Գյումրիում կորոնավիրուսով վարակված քաղաքացիների առկայության մասին չկա։ Վերջին պաշտոնական տվյալների համաձայն՝ Հրազդանում կորոնավիրուսով վարակման 1 դեպք է գրանցվել։
