ԱՄՆ նախագահ Դոնալդ Թրամփը նախազգուշացրել է, որ տնտեսական ռեցեսիան կարող է կորոնավիրուսից ավելի սարսափելի լինել: Այս մասին նա հայտարարել է Fox News հեռուստաալիքին տված հարցազրույցում:
«Դուք ինչ-որ ժամանակ ձեռքսեղմումի հնարավորություն չեք ունենա, բայց մենք պետք է երկիրը վերադարձնենք (նորմալ վիճակի) … Տեսեք, գրիպից շատ մարդիկ են մահանում, բայց դուք էլ ավելի շատ մարդկանց կկորցնեք, եթե երկիրը հայտնվի տնտեսական ծանր անկման կամ ընկճախտի մեջ: Մարդիկ կմահանան, կլինեն հազարավոր ինքնասպանություններ, շատ բաներ տեղի կունենան, անկայունություն կլինի: Դուք չեք կարող պարզապես գալ և ասել՝ եկեք փակենք Ամերիկայի Միացյալ Նահանգները, աշխարհի ամենահաջողակ երկիրը»,- ասել է Թրամփը:
Նրա խոսքով, «մենք կարող ենք հետևել սոցիալական հեռավորությանը և գնալ աշխատանքի»:
«Ստիպված կլինեք քիչ ավելի աշխատել, ձեռքերը հինգ անգամ ավելի հաճախ լվանալ, քան նախկինում, հրաժարվել ձեռքսեղմումից»,- հայտարարել է Թրամփը՝ խոստովանելով, որ «որպես քաղաքական գործիչ» նա սիրում է ձեռքսեղմումը, քանի որ դա հնարավորություն է տալիս մարդկանց հետ «ավելի ջերմ» կապ հաստատել:
ԱՀԿ վերջին տվյալների համաձայն, աշխարհում արդեն վարակված է ավելի քան 330 հազար մարդ, մահացել է ավելի քան 14.5 հազար մարդ: ԱՄՆ-ում, Ջոն Հոփկինսի համալսարանի տվյալներով, ԱՄՆ-ում վարակի դեպքերի թիվը գերազանցել է 46 հազարը, մահացել է գրեթե 600 մարդ:
