Դատական նիստերը այսուհետ ևս կլինեն տեսահաղորդակցության միջոցով։ Դրանց մեկնարկը կտրվի առաջիկա օրերին։ Այդ մասին տեղեկացնում է Բարձրագույն դատական խորհուրդը՝ հաշվի առնելով երկրում կորոնավիրուսի համավարակի կանխարգելմանն ուղղված միջոցառումների շրջանակներում դատարանների բնականոն գործունեության ապահովման անհրաժեշտությունը և առկա օրենսդրական հնարավորությունները։ Այդ նպատակով Հայաստանի Հանրապետության բոլոր դատարաններին հատկացվել են տեսախցիկներ և պրոյեկտորներ` ՀՀ Քաղաքացիական դատավարության օրենսգրքի 145-րդ հոդվածին համապատասխան` դատավարության մասնակիցների մասնակցությունը դատական նիստերին տեսաձայնային հեռահաղորդակցության միջոցների կիրառմամբ ապահովելու նպատակով: Այս պահին ընթանում են ինժեներատեխնիկական համապատասխան աշխատանքներ՝ յուրաքանչյուր դատարանում դատական նիստերի առնվազն մեկ դահլիճում տեսաձայնային անհրաժեշտ սարքավորումների տեղադրման միջոցով տեսաձայնային հաղորդակցության հնարավորությունն ապահովող համակարգի ներդրման ուղղությամբ:
Փաստաբան Ալեքսանդր Սիրունյանի խոսքերով՝ ստեղծված իրավիճակում շատ լավ լուծում է գտնվել, սակայն դա պարտադիր սկզբունքով չի, այլ կողմի համաձայնությամբ է որոշվում՝ դատական նիստը հեռահար կազմակերպել, թե ոչ։ «Այսինքն՝ կողմը պետք է դիմումով տեղյակ պահի և ասի՝ ցանկանում է, համաձայն է, որ նիստը հեռահար լինի, թե ոչ։ Կողմը եթե համաձայն չի, կարող է ասել, որ ուզում է, որ նիստը լինի առերես։ Կողմի համաձայնությանը պարտադիր է, դա դատարանի հայեցողությամբ չէ։ Արդյունքի իմաստով էլ, կարծում եմ, խնդիր չի առաջանա, շատ նորմալ, ճիշտ որոշում է կայացվել ստեղծված իրավիճակում»,- «Առաջին լրատվական»-ի հետ զրույցում ասաց Սիրունյանը՝ ընդգծելով, որ խնդիրը հատկապես սուր է Վարչական դատարանում։ «Այդ դատավորները մեղք են, նրանք օրվա մեջ գրեթե դուրս չեն գալիս 10 քմ դահլիճներից ու շփվում են հազարավոր մարդկանց հետ։ Վարչական դատարանում լիքը մարդ առանց փաստաբան է և իրենց ամբողջ ընտանիքով գալիս են նիստին մի տուգանքի ակտի համար։ Այնպես որ, իսկապես խնդիր կար, որը գուցե այս կերպ լուծվեր»,- ասաց նա։
Ինչ վերաբերում է դատական նիստերը հետաձգելուն, ապա փաստաբանը կարծում է, որ դա լուծում չէ, քանի որ առանց այդ էլ դատարանները ծանրաբեռնված են, ու եթե մոտ մեկ ամիս էլ նիստեր չկայանան, ապա բարդ իրավիճակ կստեղծվի։ «Հատկապես քաղգործերով դատարանները խեղդված են, այնպես որ, նիստերը հեռահար կազմակերպելը իսկապես լուծում է»,- եզրափակեց Սիրունյանը։
Փաստաբան Գևորգ Դավթյանի խոսքերով՝ օրենքով նախատեսված է քաղաքացիաիրավական գործերով հեռահար նիստերի անցկացումը, բայց այլ խնդիր է, թե դատարանները նման տեխնիկական հնարավորություն ունեն, թե ոչ։
Բացի դատարաններից, նաև կողմերը։ «Եթե տեխնիկական հնարավորությունները լինեն ամբողջությամբ, ապա սկզբունքորեն դա կարող է համարվել դատական նիստ։ Չեմ ասում կատարյալ, բայց նիստը կայացած կարելի է համարել։ Բայց դե նման փորձ չկա, և միայն փորձարկումից հետո կարող ենք գնահատել դրա արդյունավետությունը»,- ասաց Դավթյանը։
Անդրադառնալով հնարավոր խնդիրներին, փաստաբանը նշեց, որ այո, հնարավոր է լինեն դատական նիստեր, որոնք հնարավոր չեն լինի, կամ լիարժեք չեն լինի հեռահար եղանակով։ «Հարցեր կան, որոնք, օրինակ, կախված են մարդու էությունից, մարդու վերաբերմունքից։ Նման մանր հարցեր կան, որոնք տեսակապի դեպքում ամբողջապես ապահովելը դժվար կլինի։ Բայց որ տեսականորեն հնարավոր է հեռահար դատական նիստը, դա միանշանակ է»,- եզրափակեց Դավթյանը։
