ՀՀ փոխվարչապետ, արտակարգ դրության իրավիճակում պարետ Տիգրան Ավինյանի մարտի 24-ի որոշմամբ սահմանափակել է հանրային իշխանության բոլոր մարմինների գործունեությունը, մամուլի ասուլիսի ժամանակ այս մասին ասաց Ավինյանի խորհրդական Սուրեն Քրմոյանը։
«Հրահանգված է հանրային ծառայության գործունեությունը հնարավորինս իրականացնել հեռավար կերպով՝ առանց այցելելու համապատասխան վարչական շենքեր։ Սա նշանակում է, որ այդ վարչական շենքերում նույն որոշման հիման վրա անձինք իրավունք չունեն գտնվել, բացառությամբ այն դեպքերի, երբ տվյալ մարմնի ղեկավարը, ելնելով տվյալ մարմնի գործունեության առանձնահատկություններից, որոշում է ընդունում, որ որոշակի քանակով մարդիկ պետք է այցելեն։ Չեն աշխատելու նաև պետական մարմինների սպասարկման գրասենյակները։ Քաղաքացիները չպետք է այցելեն պետական մարմիններ՝ ծառայություններ ստանալու նպատակով։ Ծառայության կենսական նշանակություն ունենալու դեպքում, հրահանգված է, որպեսզի պետական մարմնի ղեկավարը գրասենյակում ապահովի նվազագույն թվով աշխատակիցներ։ Նրանք առավելագույն ծառայությունները կարող են մատուցել առցանց հարթակում»,- նշեց Քրմոյանը։
Քաղաքացիներն անհետաձգելի խնդիրներ ունենալու դեպքում կարող են դիմել նախարարությունների «Ֆեյսբուք»-ի էջերին, ինչպես նաև զանգել թեժ գծերին։
