Արտակարգ դրության պայմաններն այսօրվանից խստացվում են: Այսօր պարետատան հերթական նիստում հաստատվել է որոշ տնտեսական գործունեության տեսակների սահմանափակումներ: Առաջիկա յոթ օրերին կաշխատեն միայն առաջնային անհրաժեշտության ծառայությունները, խանութները, դեղատները: Ինչո՞վ է բացատրվում ավելի խիստ ռեժիմի անցնելու անհրաժեշտությունը:
Թեմայի շուրջ «Առաջին լրատվական»-ի հետ քննարկմանը մասնակցեցին Գերագույն խորհրդի պատգամավոր Ազատ Արշակյանը, վերլուծաբան Հակոբ Բադալյանը և ԱԺ «Իմ քայլը» խմբակցության պատգամավոր Տիգրան Ուրիխանյանը:
«Իրավիճակը պետք է հնարավորինս կառավարելի պահել, որպեսզի բոլոր մարտահրավերներին հնարավոր լինի օպերատիվ արձագանքել և այս պայմաններում, երբ վարակը տարածվում է, բնականաբար պետք է ձեռնարկվեն հնարավորինս խիստ միջոցառումներ»,- նշեց Հակոբ Բադալյանը:
Տիգրան Ուրիխանյանը կարևորեց ոչ միայն վարակակիրների թվի աճի տեմպը, այլ նաև վարակի տարածման աշխարհագրությունը. «Նախկինում ռեսուրսներն օգտագործվում էին հայտնի երկու օջախները զսպելու համար, և դա հաջողվում էր, իսկ հիմա քանի որ նոր օջախներ են առաջացել՝ կապված արտադրամասերի հետ, ռիսկ կա, որ հնարավոր չի լինի նույն մեթոդոլոգիայով մեկուսացում իրականացնել, և այժմ կայացվել է իրավիճակին համապատասխան ճիշտ որոշում, որպեսզի քիչ տեղաշարժ լինի հանրապետության ներսում և հնարավորինս կանխարգելվի կորոնավիրուսի տարածումը… Վտանգն այն է, որ անորոշության մեջ ենք, և վարակակիր անձը կարող է ախտանշաններ չունենալ… Եվ դա դրդել է այնպիսի գործողությունների, որ հնարավորինս սահմանափակվեն շփումները և վարակի տարածումը կառավարելի լինի»:
Ազատ Արշակյանի խոսքով՝ չպետք է խուճապի մատնվել, բայց մի քիչ անհանգիստ լինելը օգուտ է:
Հակոբ Բադալյանի դիտարկմամբ՝ կորոնավիրուսը ոչ միայն առողջապահական վտանգ է, այլ նաև աշխարհաքաղաքական գործիք է և հեռանկարային հետևանքներ է թողնելու: Ուրիխանյանը հավելեց, որ կորոնավիրուսը սպառնալիք է ամբողջ աշխարհի համար, և կան լուրջ ռիսկեր. «Այս վարակն իր կանոններն է թելադրում ամբողջ աշխարհին»:
Քննարկման մասնակիցներն ընդգծեցին, որ կորոնավիրուսը լուրջ մարտահրավեր է, նաև վնասաբեր է. «Պետք է պատրաստվենք կորոնավիրուսից հետո եկող աշխարհին»:
Մանրամասն՝ տեսանյութում: