Իրանում մեկ օրվա ընթացքում ավելի քան 1,7 հազար մարդ է վարակվել կորոնավիրուսով, մահացել է 122-ը: Վարակվածների ընդհանուր թիվը մոտենում է 25 հազարին, իսկ մահացածներինը՝ 2 հազարին, հայտնել է Իրանի առողջապահության նախարարության ներկայացուցիչ Կիանուշ Ջահանպուրը:
«Անցած մեկ օրվա ընթացքում բացահայտվել է COVID-19-ով վարակվելու 1762 նոր դեպք երկրի տարբեր շրջաններում»,- ասել է նա IRINN հեռուստաընկերությանը:
Նա նաեւ նշել է, որ 8913 մարդ առողջացել է:
«Ցավոք, անցած մեկ օրվա ընթացքում մահացել է 122 մարդ, այս պահի դրությամբ մահացածների թիվը դարձել է 1934»,- ավելացրել է Ջահանպուրը:
Առողջապահության նախարարության ներկայացուցիչը շեշտել է, որ հիվանդության աճը պայմանավորված է նրանով, որ երկիրն իր ուժերն է կենտրոնացրել հիվանդության բացահայտման համար: Մասնավորապես, մոտ 41 մլն մարդու առողջական վիճակ է ստուգվել:
Իրանի նախագահ Հասան Ռոհանին երեքշաբթի օրը շտաբի նիստի ժամանակ փաստել է, որ կորոնավիրուսից մահացածության դեպքերը սկսել են նվազել, ինչպես նաեւ նշել է, որ պակասել են նաեւ հիվանդանոցային բուժում ստացողները:
Իրանում կորոնավիրուսից մահացածների թիվը կտրուկ աճեց մարտին:
