ՀՀ քրեական և վարչական իրավախախտումների մասին օրենսգրքում կատարված փոփոխությունների վերաբերյալ «Սասնա ծռեր» կուսակցությունն օրերս տարածել էր հայտարարություն, որով, ի մասնավորի, կոչ է անում օրվա իշխանություններին ձեռնպահ մնալ խոսքի ազատությունը սահմանափակելու ամբողջատիրական գայթակղությունից։
«Սասնա ծռեր» կուսակցության քարտուղարության անդամ Վարուժան Ավետիսյանից հետաքրքրվեցինք՝ իրո՞ք տեսնում է խոսքի ազատության սահմանափակման վտանգ իշխանությունների գործողություններում։
«Դատելով պատկան մարմինների ոչ պրոֆեսիոնալ աշխատանքից, այնուամենայնիվ, գրաքննության տարրեր կան, որովհետև անհեթեթ պահանջներ են ներկայացվում սոցիալական ցանցերի օգտատերերին, ԶԼՄ-ներին՝ հեռացնելու այս կամ այն տեղեկությունը։
Մենք տեսնում ենք, որ ամբողջ համացանցը հեղեղված է կեղծ լուրերով, որոնք նաև վերաբերում են կորոնավիրուսի համավարակին, ֆիզիկապես հնարավոր չէ դա կառավարել։ Կարծում եմ, որ իշխանությունները գտնվում են իներցիայի մեջ։ Կարծես թե դեռ կան անցյալից մնացած վատ խորհրդականներ, որոնք ամբողջատիրական իներցիայի մեջ են, ինչը մեր իրավիճակին անհամապատասխան երևույթ է և հակասում է մեր պատկերացումներին։ Պետական ռեսուրսն էլ է ափսոս, որ ծախսվում է անիմաստ հարցեր լուծելու համար։ Պարոն Բադասյանն ասաց, որ մտածում են արտակարգ դրության ռեժիմի վերաբերյալ կառավարության որոշումից այդ դրույթները հանելու մասին։ Կարծում եմ, որ դա կլինի ողջամիտ քայլ»,- ասաց Վարուժան Ավետիսյանը։
Հակադարձեցինք, որ նախկին ռեժիմին սպասարկող ԶԼՄ-ները նաև հանիրավի մեղադրանքներ էին հնչեցնում իշխանությունների հասցեին կորոնավիրուսի՝ Հայաստան մուտք գործելուց հետո, այդ ամենում նույնիսկ մեղադրում վարչապետ Նիկոլ Փաշինյանին։
«Երբ այդ հարցերը համակարգային լուծում չեն ստանում, դրանք բազմանում են։ Այդ ԶԼՄ-ների զտման, մաքրման հարցը պետք էր լուծել և՛ ֆինանսավորման աղբյուրների առումով, և՛ ԶԼՄ-ներին օգնելով։ Պետությունը պետք է օգնի, որ ԶԼՄ-ները կայանան։ Նաև դա է պատճառը, որ շատ ԶԼՄ-ներ ֆինանսավորման համար ձեռքը գցում են այնպիսի տիրույթներ, որտեղից օգտվելը ճիշտ չէր լինի։ Այդ հարցերը պետք է լուծվեն համակարգային ձևով, չեն լուծվում՝ առաջանում են խնդիրներ։ Պատճառը դա է, ոչ թե գրաքննությունը։ Իսկ երբ լինում են կեղծ լուրեր, ապա պետք է ինչ-որ քայլեր ձեռնարկել։ Մենք այնպիսի ժամանակներում ենք ապրում, որ հնարավոր չէ տեղեկատվական հոսքերը կառավարել, պետք է մանրամասն, ճիշտ տեղեկություններ մատուցել։ Եթե պետությունը հավաստի, ճիշտ տեղեկատվություն հաղորդի, կարճ ժամանակ անց իրենց հնարավորություններն ի չարս օգտագործող ԶԼՄ-ները պարզապես կլռեն»,- նշեց Վարուժան Ավետիսյանը։
Հետաքրքրվեցինք, թե ինչպես է գնահատում իշխանությունների գործողությունները կորոնավիրուսի տարածումը կանխելու հարցում, կարողացա՞վ իրոք իշխանությունը համարժեք արձագանքել համավարակի տարածմանը, անհրաժեշտ միջոցներ ձեռնարկել ժամանակին, արժանահավատ տեղեկություններ տրամադրել։ Առողջապահական, կրթական միջոցառումներն արդյոք համահո՞ւնչ էին ստեղծված իրավիճակին։
«Գաղտնիք չէ, որ մեր երկիրն աղքատ է, ենթակառուցվածքները քայքայված են կամ կայացած չեն։ Բնականաբար, օնլայն ռեժիմով աշխատելիս ծագում են բազմաթիվ խնդիրներ։ Մարտի 1-ին մենք հայտարարություն էին տարածել, ներկայացրել էինք գործողությունների պլան, թե ինչ պետք է անի իշխանությունը համավարակի տարածումը կանխելու, նրա հետևանքները չեզոքացնելու համար։ Ինչ-որ քայլեր կատարվում են, սակայն իշխանությունը սկսեց այդ ամենը կիրառել ուշացումով, հրատապ միջոցառումներն էլ խիստ անբավարար են։ Մենք տեսնում ենք, որ 20-25 տոկոսով է հանրային ակտիվությունը նվազել, իշխանությունն էլ ոչ մի պատասխանատվություն չի ուզում ստանձնել, որ «Մնա տանը» սկզբունքով իրականացվի պայքարը համաճարակի դեմ, և հնարավոր լինի կարճ ժամանակում դրա դեմն առնել։ Նրանք փորձում են ինչ-որ կիսամիջոցներով պայքարել, սակայն պետք է արագ քայլեր ձեռնարկել։ Եվ այդ քայլերի շարքում պետք է դիտարկել Արցախի նախագահի խեղկատակ ընտրությունները չեղարկելը, առնվազն հետաձգելը, քանի որ այնտեղ բավականին ազատ ելումուտ կա, և այնտեղ կորոնավիրուսի տարածման մեծ վտանգ կա»,- նշեց Վարուժան Ավետիսյան