Լուրեր
Որն է ինքնամեկուսանալու և մեկուսանալու տարբերությունը. ինչ է սպասվում պահանջը խախտողներին

ԱԺ արտահերթ նիստում երկրորդ ընթերցմամբ ընդունվել է Քրեական օրենսգրքում և Վարչական իրավախախտումների մասին օրենսգրքում լրացումներ կատարելու մասին օրենքների նախագիծը: Այդ նախագիծն Ազգային ժողովում ներկայացրել է ՀՀ Արդարադատության փոխնախարար Վահե Դանիելյանը:

Ի՞նչը ստիպեց գնալ այսպիսի խստացումներին: «Առաջին լրատվական»-ի հետ զրույցում Վահե Դանիելյանը մանրամասնեց, որ նման իրավակարգավորումների անհրաժեշտությունը պայմանավորված է սոցիալական սուր անհրաժեշտությամբ՝ իհարկե, արտակարգ իրավիճակից բխող: «Ստեղծվել էր մի իրավիճակ, երբ մի շարք քաղաքացիներ մեկուսացման կամ ինքնամեկուսացման անհրաժեշտության դեպքում հոժարակամ չէին մեկուսացվում կամ ինքնամեկուսացվում, կամ ինքնամեկուսացման ընթացքում խախտում էին կարգը: Մեր տրամաբանությամբ՝ չի կարելի հույս դնել միայն քաղաքացիների սոցիալական պատասխանատվության վրա, անհրաժեշտ էր իրավական գործիքակազմ՝ համաճարակի հետագա տարածումը կանխարգելելու և հետևանքները նվազագույնի հասցնելու համար»,- նշեց փոխնախարարը՝ նաև ընդգծելով, որ մարդը ՀՀ-ում բարձրագույն արժեք է, և պետությունը պարատավոր է անել ամեն ինչ իր բնակչության կյանքն ու առողջությունը պահպանելու համար:

«Ինքնամեկուսացումը ինքնանպատակ չէ, ըստ անհրաժեշտության՝ կախված համաճարակի դեմ պայքարի մարտավարությունից, որոշվելու է, թե որ խումբ անձինք են ինքնամեկուսացվելու: Այս պահին կա պարետի կողմից սահմանված պետությունների ցանկ, որտեղից առհասարակ արգելվում է քաղաքացիների մուտքը ՀՀ, սակայն մեր քաղաքացիների վերադարձի համար որևէ բացառություն չունենք, և երբ այդ քաղաքացիները գալիս են, արդեն իսկ ունենք օրենք, որ ախտանիշների առկայության դեպքում անձը կհոսպիտալացվի, իսկ եթե ախտանիշ չկա, կինքնամեկուսացվի»,- նշեց Վահե Դանիլեյանը:

Փոխնախարարը նաև պարզաբանեց, թե որն է մեկուսանալու և ինքնամեկուսանալու տարբերությունը. «Մեկուսացման դեպքում սահմանվում է կոնկրետ վայր, որտեղ տվյալ անձանց (վարակակիրների) հետ շփումը բացառվում է այլ անձանց հետ, ինչը հեշտ է վերահսկելը: Իսկ ինքնամեկուսացման դեպքում անձի շփումները սահմանափակվում են և նա առանձնացվում է կա՛մ իր բնակության վայրում, կա՛մ իր նախընտրությամբ որևէ այլ վայրում: Այս դեպքում նույնպես պետք է վերահսկողություն իրականացվի ոստիկանության կողմից: Այսօր ԱԺ-ի կողմից ընդունված նախագծով սահմանվել է պատասխանատվություն: Մեկուսացված և ինքնամեկուսացված անձինք ունեն հավասար հանրային վտանգավորություն՝ համաճարակի տարածման ռիսկերի առումով, այդ պատճառով շատ կարևոր է, որ լինեն մեկուսացված»:

 

Մանրամասն՝ տեսանյութում:

  • Դիտումներ՝ *