«ՀՀ-ն միակը չէ, որ այս աննախադեպ իրավիճակում փորձում է համապատասխանեցնել իր օրենսդրությունը կորոնավիրուսի դեմ պայքարը կանխարգելելու չափանիշներին։ Իսկ խստացումները նրա համար են, որ հնարավորինս կանխարգելվի վիրուսի տարածումը այն դեպքերում, երբ, ըստ էության, անձանց գիտակցությունը այնքան բարձր չէ, որպեսզի չխախտեն մեկուսացման, ինքնամեկուսացման կանոնները»,-ասաց Վարդանյանը։ Նա նշեց, որ այսօր ԱԺ-ի կողմից ընդունված նախագիծը, որը սահմանում է վարչական և նաև քրեական պատասխանատվություն, վերաբերում է այն անձանց, որոնց ցուցված է պարտադիր մեկուսանալ. «Մեկուսացում և ինքնամեկուսացում հասկացությունները նախագծով սահմանված են։ Ինքնամեկուսացվածները կամ մեկուսացվածները նրանք են, որոնց իշխանության ներկայացուցիչները, պատասխանատու անձինք որոշում են կայացրել մեկուսացնել ինչ-որ վայրում, որը հնարավորություն է տալիս իզոլացնել արտաքին աշխարհից։ Նույնը ինքնամեկուսացման դեպքում, երբ ցուցվել է մեկուսանալ տանը։ Երկու դեպքում էլ խոսք է գնում համապատասխան ցուցման դեպքում պարտադիր մեկուսացման մասին։
Վարդանյանը նշեց, որ գործնականում հնարավոր չէ յուրաքանչյուր վարակակրի կամ պոտենցիալ վարակակրի դռան մոտ մեկ ոստիկան կանգնեցնել, բայց կարևոր է նրանց վարքագիծը, որ նրանք հասկանան, որ վարակի առկայության պարագայում չպետք է շփվեն այլ անձանց հետ։
Անդրադառնալով արտակարգ դրության պայմաններում լրատվամիջոցների աշխատանքին, կիրառված սահմանափակումներին, միջամտություններին, Վարդանյանն ասաց, որ լրատվամիջոցների աշխատանքը, խոսքի ազատության իրավունքը արտակարգ դրության պայմաններում սահմանափակման ենթակա իրավունք է, սակայն դատական պաշտպանության իրավունքի որևէ սահմանափակում չկա, և լրատվամիջոցները, օգտատերերը դատական կարգով կարող են բողոքարկել այդ սահմանափակումները։ «Եթե ինձ եք ուզում հարցնել, ապա ես մշտապես եղել եմ և կլինեմ խոսքի, արտահայտվելու լայն ազատության կողմնակից»,- ասաց Վարդանյանը։
Անդրադառնալով հանրաքվեին, Վարդանյանը նշեց, որ ստեղծված իրավիճակում հանրաքվեի, Սահմանադրական դատարանի հարցը երրորդական, տասներորդական նշանակություն ունի, քանի որ ներկայումս մարդկությունը պայքարում է անտեսանելի թշնամու դեմ։
Առավել մանրամասն՝ տեսանյութում։
