Այս օրերին առողջապահական խնդիրներին զուգահեռ, առանցքային են նաև տնտեսական խնդիրները, որը կա ինչպես ամբողջ աշխարհում, այնպես էլ Հայաստանում։ Համաշխարհային տնտեսական ճգնաժամը ամեն երկրի համար կունենա յուրովի անդրադարձ, որը կախված է ոչ միայն երկրի կառավարության արդյունավետությունից, այլ նաև տնտեսության բնույթից, պաշտպանվածությունից և մի շարք այլ գործոններից։
Հեղափոխությունից հետո Հայաստանում նկատվում էր շինարարության բում, նաև տների վաճառքն էր ավելացել։ Կորոնավիրուսի համաճարակով պայմանավորված՝ ի՞նչ իրավիճակ է հիմա մեր շուկայում, ինչպիսի՞ ազդեցություն է ունեցել այն մեր շուկայի վրա․ «Առաջին լրատվական»-ի հարցին «Ակցեռն» հոլդինգի նախագահ Հակոբ Բաղդասարյանը պատասխանեց․ «Բնականաբար, անշարժ գույքի ոլորտը չէր կարող անմասն մնալ այս իրավիճակից և արդեն զգացնել է տալիս։ Մարդիկ, որոնք հաշվարկել էին իրենց բիզնեսը հիփոթեքով բնակարաններ ձեռք բերելու համար, հետաձգել են, որովհետև իրենց բիզնեսում որոշակի անհանգստություն ու մտահոգություն կա հետագա վարկերի սպասարկման ու այլ թեմաներով»։
Գաղտնիք չէ, որ վերջին երկու տարում անշարժ գույքի շուկայում զգացվել է գների որոշակի աճ։ Հիմա այս ճգնաժամով պայմանավորված՝ աճի տեմպերը պահպանվելո՞ւ են, թե՞ հակառակ ազդեցություն է լինելու․ «Առաջին լրատվական»-ի հարցին Հակոբ Բաղդասարյանը պատասխանեց․ «Աճի տեմպերը, միանշանակ, չեն կարող պահպանվել։ Պետք է նշեմ, որ բիզնես ոլորտն այսօր առավելագույնը 30-40 տոկոսով է աշխատում։ Իհարկե, խոսքս չի վերաբերում հիվանդանոցներին կամ սննդի վաճառքով զբաղվող առևտրային ցանցերին։ Այստեղ խոսքը վերաբերում է ծառայությունների մատուցմանը, որոնք անորոշությամբ են իրենց աշխատանքները շարունակում։ Գների նվազումն այդ արագությամբ չի կարող կատարվել, որովհետև մինչև գների նվազումն այն իր մեջ տնտեսական վնասներ է ներառում։ Բայց, իհարկե, եթե պրոցեսը երկարի ու շարունակական դիտվի, ապա կարող է իր առաջ բերել ձեր ասած երևույթները»։
Մանրամասները՝ տեսանյութում։