«Եթե կորոնավիրուսի դեպքերի թիվը բոլորի 200-ը, մենք չպետք է խուճապի մատնվենք, որովհետև դինամիկան տեսնում ենք: Ինձ թվում է՝ կգա մի օր, երբ թվերը կգնան դեպի նվազում: Բոլոր դեպքերում ինձ թվում է՝ պետք չէ վախենալ թվերի լուրջ մեծացումից»,- «Առաջին լրատվական»-ի հետ զրույցում ասաց Երևանի պետական բժշկական համալսարանի գիտության գծով պրոռեկտոր, կենսաբանական գիտությունների դոկտոր, պրոֆեսոր Կոնստանտին Ենկոյանը:
Նրա խոսքով՝ եթե մենք հետևենք հիգիենայի կանոններին և բոլոր այն գործոններին, որոնք հորդորում են մեր մասնագետները, ապա թիվը կլինի միանշանակ ավելի փոքր: Մեր զրուցակիցը միաժամանակ տրամաբանական է համարում համաշխարհային թվերի աճի դինամիկան. «Վիրուսը չես թաքցնի, սահմանները բաց են, և մարդիկ ժամանակին շփվել են իրար հետ, և մենք այսօր նոր ենք բացահայտում: Եվ հիմա ամբողջ աշխարհում շատ ավելի խիստ միջոցառումներ են սահմանվում»:
Ինչ վերաբերում է վիրուսի տարածման կանխարգելման գործում մարդու անձնական պատասխանատվությանը, Կոնստանտին Ենկոյանը նկատեց, որ ցանկացած հիվանդության կանխարգելման համար պատասխանատվություն է կրում յուրաքանչյուր ոք. «Այսինքն՝ մեր տարբեր հիվանդություններ պայմանավորված են նաև մեզանով, մեր առողջ ապրելակերպով, մեր կանխարգելիչ միջոցառումներով»:
Նրա կարծիքով՝ մեր ժողովուրդը գնալով ավելի ադեկվատ է պատասխանում իրավիճակին և փորձում է մաքսիմալ զգոն լինել:
Հարցազրույցն ամբողջությամբ՝ տեսանյութում: