«Միացյալ Նահանգներում մեկուսացման քաղաքականություն, որպես այդպիսին, չի վարվում՝ ի տարբերություն Հայաստանի: Այն բոլոր մարդանց, որոնք գտնվում էին օդանավակայանի սրահում, իսկ նրանք քիչ չէին, քանի որ ժամանել էր միջազգային 3-4 չվերթ, թույլ տրվեց դուրս գալ և գնալ իրենց բնակության վայրերը՝ բնականաբար պարզելով անձնական տվյալները, հեռախոսահամարները, սակայն վերջին 5 օրվա ընթացքում, ինչ ես գտնվում եմ Միացյալ Նահանգներում, որևիցե զանգ որևիցե մարմնի կողմից՝ պարզելու իմ որպիսությունը կամ ախտանշանների առկայությունը, չի եղել»,- ԱՄՆ Գլենդել քաղաքից «Առաջին լրատվական»-ին փոխանցեց մեր թղթակից Էլեն Հոխիկյանը:
Ինչ վերաբերում է ԱՄՆ-ում և ՀՀ-ում խուճապային տրամադրությունների համեմատությանը, մեր թղթակիցն ասաց. «Արտակարգ դրություն հայտարարելուց անմիջապես հետո Միացյալ Նահանգներում քաղաքացիների բավականին ստվար հատված շտապեց խանութներ՝ կուտակելու համար պաշարներ՝ սննդամթերքի և ոչ միայն, թեև ի սկզբանե հայտարարվել էր, որ որևիցե խանութ և արտադրամաս չի փակվելու: Սակայն սա քաղաքացիներին չի հանգստացրել, և տարբեր խանութներ կիրառում են սահմանափակումներ, օրինակ՝ հնարավոր չէ ձեռք բերել 2 տուփ ձվից ավելի, 4-5 հացից ավելի: Այնինչ ՀՀ-ում թե՛ սուպերմարկետները, թե՛ փոքր խանութները շարունակում են աշխատել նույն ռեժիմով, և որևիցե ապրանքատեսակի պակաս այսօրվա դրությամբ չկա»:
Ինչ վերաբերում է պաշտպանիչ միջոցներին, մեր թղթակիցը նշեց, որ Միացյալ Նահանգներում գրեթե անհնար է գտնել դիմակներ, ձեռնոցներ, ալկոգել:
«Եթե Երևանում շատ ավելի հեշտ է թեստավորվել՝ պարզելու համար, թե վարակվա՞ծ ես արդյոք կորոնավիրուսով, ապա Միացյալ Նահանգներում դա շատ ավելի բարդ է իրականացնել, քանի որ, ինչպես նշում են, թեստավորման կենտրոններն այնքան էլ շատ չեն. Նահանգներն այս իմաստով չի հասցրել հավուր պատշաճի պատրաստվել: Չի բացառվում նաև, որ ԱՄՆ-ում արգելք սահմանվի տանից դուրս գալու վրա»,- եզրափակեց Էլեն Հոխիկյանը:
Մանրամասն՝ տեսանյութում: