Այս պայմաններում այդպիսի քայլ կատարելը բացարձակապես չի բխում ՀՀ քաղաքացիների շահերից։ Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Վաղարշակ Հակոբյանը՝ անդրադառնալով նրան, որ ՀՀ նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի նախկին վարչապետ Անուշավան Դանիելյանը ցանկանում են դատարանում հանդես գալ Ռոբերտ Քոչարյանի խափանման միջոց կալանքը անձնական երաշխավորությամբ փոխարինելու միջնորդությամբ։
«Դուք նշեցիք անուններ, նրանց անունների առաջ դնելով նախկին բառը։ Ես ուզում եմ հասկանալ, թե ինչու են նախկին վարչապետներն իրենց իրավունք վերապահել խառնվել այս գործընթացին, անի որ սա դատական պրոցես է։ Իրենք որևէ ինստիտուտի ներկայացուցիչներ չեն, չեն ներկայացնում որևէ գործող ինստիտուտ, նրանք չունեն դրա լիազորությունը։ Սա ընդամենը քայլ է, որ նախկինները փորձում են որոշակի աջակցություն բերել երկրորդ նախագահին, բայց ես կարծում եմ, որ սա չարդարացված քայլ է։ Ես ևս մեկ անգամ տվյալ մարդկանց խոհեմության կոչ եմ անում, որ այս իրավիճակում նախկին վարչապետները, որոնք այս կամ այն «հերոսությամբ» հայտնի են, իրենց իրավունք չվերապահեն խառնվել դատապրոցեսին»,-ասաց պատգամավորը։
