Կորոնավիրուսն այսօր ընդլայնում է իր աշխարհագրությունը, և պետությունները զգում են դրա տնտեսական հնարավոր ազդեցությունները։ Այս օրերին ամենաշատ վարակակիրներ ունեցող պետություններում ի՞նչ տենդենց է նկատվում, և դրանից ի՞նչ հետևություններ կարող ենք մենք անել․ «Առաջին լրատվական»-ի հարցին ԱԺ «Լուսավոր Հայաստան» խմբակցության պատգամավոր Արկադի Խաչատրյանը պատասխանեց․ «Կարծում եմ, որ ցանկացած պետություն, որն ունի բաց տնտեսություն, չի կարող անմասն մնալ այս համաճարակի պատճառով առաջացած տնտեսական հետևանքներից։ Բացասական ազդեցությունը երկրների վրա կարող է լինել երկու տեսակի՝ ուղղակիորեն և միջնորդավորված՝ համաշխարհային տնտեսության բացասական ազդեցությունից եկող։
Երբ գնահատում ենք համաշխարհային տնտեսության տենդեցները, կորոնավիրուսի տարածումն ունի հետևյալ ազդեցությունները, որոնց արդյունքում այն տարածում է ստանում։ Առաջինը դա ապրանքահումքային շուկաների վրա ազդեցությունն է՝ մասնավորապես մետաղների, նավթի գնանկումները։ Չինաստանն իր տնտեսությամբ զգալի կշիռ ունի համաշխարհային տնտեսության մեջ, հետևաբար չի կարող ազդեցություն չունենալ։ Եթե այնտեղ սպառումը և արտադրությունները կրճատվում են, ապա այդ հումքի և ապրանքատեսակների սպառման նվազումն իր բացասական ազդեցությունն է ունենում գնանկումային տեսքով։
Մյուսը, իհարկե, դա սահմանների փակումն է, որն իր ծանր հետևանքներն է ունենում զբոսաշրջության վրա։ Այն երկրները, որոնք հիմնականում մասնագիտացված են զբոսաշրջային ծառայությունների մատուցման բնագավառում, բնականաբար չեն կարող ծանր հետևանքներ չունենալ։
Իսկ մյուսն էլ, բնականաբար, դա արտաքին առևտրի վրա ազդեցությունն է, որն ազդում է երկրների միջև ապրանքաշրջանառության և դրա կառուցվածքի վրա։ Այն ևս բերում է բացասական տենդենցներ, և նվազում է ընդհանուր տնտեսական ակտիվությունը տարբեր երկրներում»։
Մանրամասները՝ տեսանյութում։