Մի շարք ազգային օլիմպիական կոմիտեներ դիմել են Միջազգային օլիմպիական կոմիտեին` Տոկիոյի խաղերը հետաձգելու խնդրանքով: Նախ նման առաջարկով հանդես եկավ Նորվեգիայի կոմիտեն` ընդգծելով կորոնավիրուսի պանդեմիայի փաստը: Ապա հրապարակվեց Բրազիլիայի ԱՕԿ-ի նամակը, որում ևս խաղերը հետաձգելու խնդրանք կար:
Օրեր առաջ ՄՕԿ-ը հանդես էր եկել հայտարարությամբ, որ դեռևս վաղ է համարում որոշում ընդունել Խաղերի հետաձգման մասին, քանի որ մինչև 32-րդ խաղերը դեռևս 4 ամիս կա:
32-րդ ամառային Օլիմպիական խաղերը կհյուրընկալի Տոկիոն: Դրանք կմեկնարկեն հուլիսի 24-ին և կեզրափակվեն օգոստոսի 9-ին: Աշխարհի 206 երկրից մոտ 11 հազար մարզիկ կմրցի 33 մարզաձևում: Հեռավոր 1964 թվականից հետո Տոկիոն երկրորդ անգամ է հյուրընկալելու Օլիմպիական խաղերը: Օլիմպիական խաղերի ջահը կշռում է 1,2 կգ և ոսկե սակուրայի տեսք ունի և վերևից սակուրայի ծաղիկ է հիշեցնում: Ժամանակակից Օլիմպիական խաղերը հիմնադրել է ֆրանսիացի Պիեռ դե Կուբերտենը՝ 1896 թվականին: Առաջին ժամանակակից Օլիմպիական խաղերը կայացել են Աթենքում՝ նույն՝ 1896 թվականին: Օլիմպիական խաղերի պատմության մեջ համաշխարհային պատերազմների պատճառով չեղարկվել է երեք խաղ. 1916 թվականին՝ Բեռլինում, 1940 թվականին՝ Տոկիոյում և 1944 թվականին՝ Լոնդոնում: Ամենաշատ Օլիմպիական խաղեր հյուրընկալել է Լոնդոնը (1908, 1948, 2012):