«Կուսակցությունների մասին» օրենքի փոփոխությունների փաթեթը նախորդ ամիս ուղարկվել է և Վենետիկի հանձնաժողովին, և ԵԱՀԿ/ԺՀՄԻԳ-ին, որովհետև այդ երկու կառույցները համատեղ կարծիքեն ներկայացնելու: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Համազասպ Դանիելյանը:
«Երկու շաբաթ առաջ այդ երկու կառույցների ներկայացուցիչները Հայաստանում էին մեր հրավերով: Նրանք հանդիպումներ ունեցան թե իշխող, թե մյուս խմբակցությունների հետ, թե քաղհասարակության ներկայացուցիչների հետ, և ակնկալվում էր, որ մարտի 20-ից հետո տեղի ունենալիք Վենետիկի հանձնաժողովի նիստում կհաստատվեր վերջնական տարբերակը, բայց հավանաբար տեղյակ եք, որ այդ նիստը տեղի չի ունենալու կոնորավիրուսի պատճառով: Բայց իրենք հեռակա կարգով աշխատելու հնարավորություն ունեն և մենք մարտի վերջին կունենանք վերջնական տարբերակը: Ես ծանոթ եմ նախնական տարբերակին, որը, իմ կարծիքով, խիստ դրական է արձագանքում մեր առաջարկած փոփոխություններին»,-ասաց նա:
Համազասպ Դանիելյանը հավելեց, որ այն պահին, երբ կունենան պաշտոնապես հաստատված տարբերակը, իրենք գուցե որոշ ռեկոմենդացիաներ հաշվի առնելով, այն կդնեն շրջանառության մեջ: Նա չբացառեց, որ ԲՀԿ-ն ու ԼՀԿ-ն կարող է հանդես գան որպես համահեղինակ:
«Մենք գարնանային նստաշրջանի ավարտին ակնկալում ենք, որ կունենանք այդ օրենսդրությունը ընդունված: Այս պահին ոչ մի բան դրան չի կարող խոչընդոտել»,-ասաց նա:
Անդրադառնալով արտակարգ դրություն հայտարարելուն և հանրաքվեն հետաձգելուն և դիտարկմանը, որ արտակարգ դրությունից հետո հանրաքվեն կարող է ձախողվել, համազասպ Դանիելյանը նշեց, որ իշխանությունը մտահոգություն չունի, որ «այո»-ն կարող է չհաղթել. «Մեր խմբակցության միակ մտահոգությունը ՀՀ քաղաքացիների բարօրությունն է: Դա է կարևորը, ոչ թե թեկուզ կարևոր, բայց մեր քաղաքական օրակարգը, այդ թվում հանրավքեի իրականացումը»: